Dialuna ultimo Minister di Transporte, Integridad, Naturalesa y Asuntonan di Adulto Mayor, Minister Ursell Arends tabata di bishita na Tele Aruba durante e programa di Nos Mainta. Den combersacion Minister Arends a elabora riba e temanan di Adultonan Mayor y tambe Integridad.
Segun Minister Arends, “e ta inacceptabel cu unabes bo yega edad di pensioen, bo ta wordo poni un banda y nan ta bisa bo cu bo no ta conta mas”. Nos mester duna nos grandinan e balor cu nan merece, duna nan e oportunidad y hermentnan necesario pa nan por sigui contribui positivamente na nos comunidad.
‘Na e etapa cu nos ta aworaki como isla, Aruba mester di nos tur’, Sr. Arends a subraya.
Di parti di e maneho cu lo hiba, lo introduci help desk dedica na nos Adultonan Mayor. Den e manera cu lo organisa esaki lo atende cu e retonan cu nan ta enfrenta, for di cuido integral, salud mental, y tambe pa combati formanan di abuso contra nos grandinan.
Riba e tereno di Integridad, Minister Arends, despues di a huramenta como minister, a inicia e trabounan pa percura pa instalacion di e ‘Integriteitskammer’. Ademas lo bay traha duro pa introduci e “code of conduct/ integriteitsbeleid” den e aparato publico pa e ambtenaar y tambe na nivel di Minister.
“Pueblo ta spera esaki di nos y di e forma aki nos por ta un ehempel pa henter e comunidad. Durante di e ultimo añanan tareanan grandi a wordo haci, e fundeshi a wordo traha caba pa integridad por wordo duna e prioridad y urgencia cu e merece. Esaki ta loke nos ta compromete nos mes na comunidad, cu den e proximo 4 añanan, como Minister di integridad nos lo sigui duna esaki contenido pa asina aki mustra pueblo cu loke cu a wordo haci lo sigui haya e atencion debido pa asina integridad sobresali den e proximo 4 añanan un bes mas,” Minister Ursell Arends a termina bisando.
