Diaranson 18 di augustus, durante entregamento di bandera di Aruba na Atleta Paralimpico Elliott Loonstra, Prome Minister Evelyn Wever-Creos den nomber di Gobierno di Aruba, a entrega e reconocemento ‘Muhe di Excelencia’ na señora Nicole Hoevertsz como gradicimento pa su dedicacion profesional y dinamico na deporte pa Aruba.
Señora Hoevertsz recientemente na Tokyo a wordo eligi como Vice- President di Comite Olimpico Internacional. Esaki ta muestra y resultado di su dedicacion y amor pa Deporte pa Aruba. Nos isla ta chikito den Caribe y señora Hoevertsz a skirbi nos nomber Aruba den paisnan grandi internacionalmente.
“Pabien Nicole cu e titulo aki bon mereci. Danki pa eleva nomber di Aruba na nivel internacional como Vice Presidente di Comite Olimpico Internacional. Mi ta gradici Comision Olimpico Arubano y tur nos atletanan cu a participa na Tokyo. Danki pa representa Aruba. Cu boso participacion na e evento deportivo internacional aki, ya boso ta un ganado”, Prome Minister ta expresa.
