Criollo Reds ta kita un di Surprise 10-9 mientras Kibaima ta derota Quisqueya 9-5

Campeonato Liga 40 organisa pa Criollo Reds Softball team a continua weekend pasa riba veld di Olimpic. Organisadornan Criollo Reds tabata marduga riba tereno pa prepara e tereno pa weganan cuminsa na ora esta exactamente 10 am como cu ta nan mes lo estrena e tereno pa cu e promer wega. Criollo Reds a ricibi Surprise  y den un wega di 19 careda tras di 28 hit den combinacion pues  hopi bataso y hopi careda Criollo Reds ta derota Surprise 10-9 pa asina celebra henter dia. Criollo Reds 10 careda, 15 hit, 5 error. Surprise 9 careda, 13 hit, 2 error. Marlon Lampe ta resulta pitcher ganador y e x internacional Poy Flanegin ta bay cas cu e derota. Mihor bateadornan pa Criollo Reds a resulta  Joselito Quandt, Gilbert De Cuba ambos di 3-2. Marlon Lampe aportando na su propio causa tambe a bay di 3-2 y Randolf Alberto a bay di 2-2. Pa Surprise a destaca na plato den causa perdi Richard “Nunn” Flanegin di 4-3, Charles Danker 4-2, Wladimir Wever y Juan David Arango ambos di 2-1.  Den un otro wega Kibaima ta derota Quisqueya cu score di 9-5. Kibaima 9 careda, 8 hit, 1 error. Quisqueya 5 careda, 8 hit, 3 error. Freddy Maduro ta cubri e ruta y ta seya e victoria riba su nomber. Clemente Garcia ta sali pitcher perdedor y mester conforma su mes cu e derota. Mihor bateadornan pa Kibaima ta Roderick Simon 2-2, David Eusebius di 3-2 incluyendo un cuadrangular, Renny Hernandez y Byron Boekhoudt  a aporta bayendo 3-1. Pa Quisqueya a luci na plato Juan Jesus Chirino 3-1, Modesto de La Cruz 2-1, Armando Chacon y Edgar Bautista di 3-1. Weekend vinidero campeonato di Liga 40 lo continua den curason di Sta Cruz na veld di Olimpic.