Despues di a gasta algun minuut valioso pa desbarata fechorianan di AVP, instrui door di Mike Eman, nos a termina awe e “nader rapport” riba e ley di “identificatieplicht”. Hunto cu colega sr. Tevreden nos a traha riba e puntonan cu conseho consultativo a trece padilanti y mañan lo entrega e producto final na Presidente di Parlamento.

META DI E LEY

E meta di e ley aki ta pa brinda trahadornan den e aparato hudicial un instrumento mas pa eherce nan tarea di control. Consecuentemente esaki lo fortifica mantencion di orden en general. Lugarnan publico mas mihor controla y mas sigur lo ta e resultado. Banda di e balor agrega riba e aspecto represivo e ley aki lo tin su efecto preventivo tambe pa diferento tipo di criminalidad.

PROCESO DI CONTROL

A tene cuenta cu e hecho cu e instrumento aki ta uno pisa y p’esey den e ley a mara su uzo na un training intensivo. Na mes momento a incorpora tambe e obligacion na e Minister di Husticia pa bin cu reglanan na cual e “opsporingsambtenaren” mester atene nan mes na dje pa por pidi un persona su papel di identificacion. Na mes momento tambe mester bin cu regla pa maluzo di e autoridad aki.

PA CONCLUI

Cu introduccion di e ley aki no ta mina derecho di nos ciudadanonan. E ta brinda solamente polis y “buitengewone opsporingsambtenaren” mas autoridad pa eleva seguridad. Si ta necesario cu un polis pa eherce su trabou mester pidi un ciudadano pa identifica su mes, esaki mester ta obligatorio. Si esaki no ta e caso e effectividad pa mantene orden y brinda seguridad ta declina.

Mañan 11or di mainta lo entrega e ley aki. Un ley den cual ta duna esnan cu ta traha den e cadena hudicial un base legal, pa ora ta necesario pa eherce nan tarea, por exihi papel di identificacion di un ciudadano.