COHO Y RAFT TA RECONOCE NOS DERECHO COMO PAIS, NOS AUTONOMIA

“Nos strategia di keda cu firmesa na mesa pa negocia y no core firma, a haci cu awe nos a logra cosnan grandi pa Aruba”

COHO y RAFT ta dos producto di negosacion cu Hulanda. Durante e reunion publico di diahuebs mainta den Parlamento di Aruba, Prome Minister Evelyn Wever-Croes a duna ampio splicacion di e 3 diferente producto di negosacion cu Hulanda cuanan ta Lanspakket, COHO y RAFT.

COHO:

COHO ta e ley di consensus cu ta regla e organisacion pa asina supervisa y sostene e trabounan den e Landspakket. COHO na prome instante tabata e organo cu mas poder cu ta wordo guia pa BZK. E organo aki lo tawatin mas poder cu Gobierno y Parlamento. Den e 13 luna di negociacion, esaki a cambia y awor COHO ta supervisa y yuda dunando sosten, e no ta stipula ni impone y mucho menos dicta. E mas importante ta cu e autonomia di nos pais ta wordo garantisa den dje hunto cu e respet pa Parlamento.

RAFT:

RAFT ta E otro ley di consensus pa regla e supervision financiero. E motibo pakico Hulanda ta insisti riba un Rijkswet Financieel Toezich pa Aruba enbes di un Landsverordening Financieel Toezicht ta pasobra na fin di e trayecto aki, Hulanda a fia nos mas di 1000 miyon florin na 0%. Hulanda kier un supervision poco mas estricto con bo ta maneha bo finansas pa sigura cu nan ta haya e placa bek pasobra na fin di dia Hulanda tambe mester duna cuenta na nan pagado di impuesto.

“Pues e ultimo 13 lunanan tabata negociacionnan intenso. Negociacionnan fisicamente y/of virtual. Nos a logra si cu nan a reconoce nos derecho, nos autonomia. Esaki ta un periodo cu nos ta full dependiente di nan pasobra cada luna di nobo nos ta depende di nan”, Prome Minister a duna di conoce.

Over di e periodo di April 2020 te cu di 3 kwartaal 2021, Aruba a presta 5 tranche na 903 miyon florin na 0% di Hulanda. Pa e di 4 kwartaal, ta calcula cu lo ta rond di 180 miyon. Ta calcula pa otro aña, un kwartaal ta bay ta necesario cu tambe ta mas o menos 180 miyon.

“Te cu juni aña pasa nos tabata mira e situacion uno hopi scur, dificil y inhusto pasobra mientras nos ta kibra como pais, nos ta bin haña e condicionnan aki imponi riba nos. Aworakinan 13 luna despues, mirando cuanto nos a presta na 0%, mi ta kere e strategia cu nos a hiba di keda na mesa y no yega firma di biaha, pero cu firmesa sigui negocia, awe nos por bisa cu nos a logra cosnan grandi pa Aruba.