Biografia di Ricaldo Cado Van der Biezen
30 october 1958 – 8 augustus 2021
Ricaldo Cado Van der Biezen a nace na Aruba riba 30 di october 1958 na Spaans Lagoen # 81-L , ultimo biba Koyari # y casa cu sra. Maria van der Biezen-Ridderstaat d.f.m.
Yiu di Petronilia Ninita Van der Biezen-Henricus d.f.m. y Rafaël Van der Biezen d.f.m., miho conoci como Fai.. un famia di 3 yiu. Cado ta e mayor di e tresnan, sigui pa Yolanda Croes-Van der Biezen d.f.m. y esun mas chikito di famia tabata Rigoberto Van der Biezen, miho conoci como Rigo d.f.m.
Su subrino/subrinanan: Yoally Croes y famia, Yoanny y Yovanna Croes y famia, y Yovanny Croes.
Cado a bay scol basico, y despues a sigui LTS na John F. Kennedy School. E tempo aya e scol di ofishi.
Su parti laboral ta como lo siguiente:
•10 april 1979 ela a cuminsa na WEB N.V.
•1993 ora WEB NV. a privatisa, Ela bay Task force di Directie Onderwijs te cu 1995.
•1995 – 1997 tabata tin inkrimpring y ela bay cas.
•7 di mei 1997 ela cuminsa traha na Inistituto di Cultura Aruba como onderhoudsmedewerker
•Cu reorganisatie di Instituto di Cultura Aruba pa Directie Cultuur Aruba su funcion a bira Medewerker Facilitaire Zaken.
•10 di april 2004 – ela cumpli 25 aña den servicio di Gobierno di Aruba.
•10 di april 2009 – 30 aña den servicio di Gobierno di Aruba.
•10 di april 2014 – 35 aña di servicio di Gobierno di Aruba.
•1 juli 2016 – El a tuma su VUT.
Den proyectonan unda ela wordo gradici pa su labor y colaboracion ta:
Padu del Caribe 90 aña
2000 CCDN
2011 Koningkrijksspelen y 25 aña KPA
2013 Dera Gay
2015 Comision Bernadina Growell (sept) …
Cado su parti cultural folklorico:
Cado a funda Tipico Nos Hubentud di Pos Chiquito mas o menos na fin di añanan 70 y na comienso di añanan 80… Nan tabata toca na eventonan social, cultural y tambe pa e sector turistico na Holiday Inn Hotel promoviendo nos musica tipico local. Por menciona tambe cu e tipico aki tabata acompaña un grupo di baile na Holiday Inn Hotel mes… Entre e bailadonan nos ta corda sra. Miekey Gravenhorst y sr. Romulo Fingal, kendenan tabata e bailadonan estrea den e tempo ey.
Despues cu e Tipico Nos Hubentud di Pos Chiquito a sigui desaroya y a participa den un festival di mandolin, organisa pa Sr. Chua Farro na Hofi Seroe Janchi. Aki ta unda e resultado di e festival di 18 di juli 1982 a resulta den Ricaldo Cado Van der Biezen como e Ganado absoluto di e Festival di Mandolin, sr. Ricky Kock como sub campeon di e Festival y na di tercer luga sr. Tino Ruiz. Na e festival aki tabatin un total di 32 participante musico cu ta domina su mandolin.
Na mesun aña riba 12 di September 1982, Sr. Chua Farro a organisa un Festival Antiano di Compentencia di Mandolin na Hofi Seroe Janchi. Na unda Tipico Santa Rosa a bini representa nos isla ruman Curaçao y e resultado di e festival ey, Sr. Tino Ruiz a sali na di prome luga y acompaña pa Los Pimentosos y na di dos luga a sali sr. Freddy Domicilia acompaña pa Tipico Santa Rosa di Curaçao y na di tres luga a Sali Sr. Ricaldo Cado Van der Biezen na di tercer luga y acompaña pa Tipico Nos Hubentud di Pos Chiquito. Un total di 5 participante tabatin den e Festival Antiano di Mandolin.
Na 1984 Ricaldo Cado Van der Biezen a uni cu Tipico Los Genios di Piedra Plat y esaki tabata di corto tempo. Pa despues a tuma luga un fusion entre Tipico Nos Hubentud di Pos Chiquito cu Tipico Los Genios di Piedra Plat. For di e fusion aki nos por menciona e formacion di Tipico Ola Tropical.
Pa ser exacto riba e fecha di 15 di maart 1986, Tipico Ola Tropical a keda funda. Na unda cu Cado van der Biezen tabata e manager y Ricky Kock tabata e director musical. Integrantenan di Tipico Ola Tropical tabata riba timbal sr. Pierre Albert, guitara tre ta sr. Armando Koolman, Cuatro ta Sr. Nelson Dubero, riba baho sr. Rudy Thiel y sr. Ricky Kock riba Mandolin y Fio y Cado tabata riba Mandolin y Congas.
Tipico Ola Tropical:
E Tipico Ola Tropical a start sali despues di basta ensaño y preparacion pa e lansamento di e prome Cassette Musical Ola Tropical. Despues di e lansamento di Cassette Tipico Ola Tropical a graba un disco 45 Rpm cu e piesa musical di Fiesta di San Juan, dera gay na 1987. Cu riba dia 16 di juni 1987 a ser entrega na Minister di Cultura di e tempo ey Sr. mr. Mito Croes d.f.m. E aña ey riba 24 di juni e piesa aki di Fiesta di San Juan, dera gay a resona na tur radio emisora di Aruba.
Na mesun aña di 1987 riba dia 7 di december Tipico Ola Tropical a lansa su prome LP titula ‘Cu Nos Burico’ y tambe tabata e nomber di e piesa ritmo tumba componi pa sr. Cado Van der Biezen. Algo peculiar di e piesa aki pa esnan cu ta corda ainda tabata e grito di un burico haci como efecto riba e fio di Ricki Kock.
Na 1987 Tipico Ola Tropical a participa na e Festival di Dande y Tipico di sr. Harry Croes y a sali na prome luga den e seccion Tipico cu e piesa “Cu Nos Burico”. E diasabra anochi aki Sr. Cado Van der Biezen ta ricibi e premio for di man di e director di Instituto di Cultura Aruba sr. Leo Tromp d.f.m..
Riba diamars 29 december 1987 Tipico Ola Tropical ta sali nomina como e miho agrupacion tipico di Aruba den e Premio Mo Tito y Rufo Wever cu e tempo ey tabata dedica na sr. Jossy Brokke Junior.
Na 1988 e grupo Tipico Ola Tropical a lansa nan di dos LP titula ‘Mi Sombre’.
Na 1988 ora cu Sr. Harry Croes a bini cu e premio di propio composicion pa prome biaha den e Festival di Dande, akli Ricaldo Cado Van der Biezen a gana e premio na prome luga di propio composicion cu e piesa titula ‘Ban Ban Canta Hunto’, un tumba. Premio cu a ser entrega door di Sr. Leo Tromp, director di Instituto di Cultura Aruba na Sr. Cado van der Biezen.
Na 1988 y 1989 e agrupacion Ola Tropical a bolbe gana e premio Mo Tito y Rufo Wever como miho agrupacion musical tipico bou direccion di sr. Cado Van der Biezen. Cu integrantenan Alberto Kock riba percusion y Stanley Dabian riba cuarta.
Na 1989 Tipico Ola Tropical a biaha pa Francia pa respresenta Aruba hunto cu e grupo di Baile Teatro di Danza Arubano b.d.d. Sra. Diana Antonette na e famoso ‘Festival Catorce de Juliette Le Monde Folklor’, un festival mundial di folklore cu un duracion un luna largo.
Mesun aña na 1989 Ola Tropical a participa na e prome festival ‘Un Canto pa Aruba’ organisa pa sr. Joochi Bislik riba e tereno di Feria na Santa Cruz, caminda a compaña sra. Eileen Croes cu e piesa ‘Aruba Noble Patria’ y a gana e dos premionan maximo cu ta Ganado absoluto y Prome luga piesa Tipico.
Ola Tropical tabata un agrupacion tipico hopi popular, nan a bay representa Aruba na varios pais, entre nan Miami, Venezuela, Francia, Merca, Corsou, Boneiro, Hulanda y tambe cu hopi presentacionnan local, tanto na hotel, Bonbini Festival, e Fiesta di San Juan pa hopi aña na Club Sport Boys, Festivalnan di Canto dedica na nos Himno y Bandera, Festivalnan di Dande.
Na 2006 Tipico Ola Tropical a lansa un produccion den un disco compacto cual tabata e ultimo produccion di e agrupacion aki.. E disco compacto aki tabata titula ‘Pais yen di Amor’… Otro parti peculiar den e disco compacto aki ta cu tin e bos di sr Gilberto F. Betico Croes den e piesa ‘Pais yen di Amor’, un waltsz.
Esaki ta un parti chikito di e Tipico Ola Tropical, pasobra e lista ta hopi largo.
Info general di Cado:
Nos colega Ricaldo van der Biezen, miho conoci como Cadoa toca den varios agrupacion musical manera Tipico Nos Hubentud di Pos Chiquito, Los Genios di Piedra Plat, Ola Tropical, Grupo Cakiña di ICA prome cu sr. Albi Navas, dirigente, saxofonista, docente di canto, sigui Grupo Cakiñahunto cu Vale Croes d.f.m., ultimo Grupo Cakiña cu Chencho Kelly, Grupo Alma Folklorico, Brisa Tropical, Zjilea hunto cu Chencho Kelly, y varios agrupacion mas. Cado ta cantante, musico, y compositor, kende tambe a toca varios aña cu Grupo Cakiña di ICA na tur nos proyecto di Fiesta di San Juan, dera gay na schoolnan y Cas di Cultura for di aña 2003.Cu su grupo Ola Tropical el a toca hopi aña mes durante celebracion di Fiesta di San Juan na Club Sport Boys na Angochi. Cu Ola Tropical y varios otro agrupacion tipico el a toca tanto den Festival un canto na Aruba su Himno y Bandera y di Dande.
Cado ta un artesano tambe y kende tabata traha e caha di orgel miniatura nan y otro obranan artisanal.
Di 2012, Cado a cuminsa train cu Brisa Tropical, un grupo tipico. El a duna masha hopi presentacion hopi contentosemper. Pasobra e semper tabata un persona alegre. Na Centro di Bario Brazil el a toca den festivalnan di Dande y tambe esunnan dedica na nos Mama di Cultura.
Ultimo festival cu Cado a toca tabata: E Cancion di Caya den Paradanan Cultural cu Tipico Brisa Tropical riba caminda. Tres (3) biaha el a bay Bonaire cu Tipico Brisa Tropical pa representa Aruba. Y el a pasa paranda cu Ricky Kock di Cas pa Cas algun biaha.
Ki bunita e mandolin a zona na hopi fiesta di famia.
Na acividad y celebracionnan su bos tambe a resona na Bonbini Festival, Cado y Tipico Brisa ki Alegria hopi turista a scucha y gosa di Aruba su musica atraves dje.
Presentacionnan na Carubbean Festival na San Nicolaas den Caya y cuanto hende y turista tabata para scucha y baila riba ritmo y e bon canta di Cado. E ultimo toca cu Cado a scucha tabata dia cu Ricky Kock bishit’e, e anochi ey e no por ta tocapa otronan scuch’e.
Dios a mira Cado carga su momento di malesa y Papa Dios a manda busk’e pa libre di su dolornan cu e momento dificl eytabata causa.
Grupo Brisa Tropical a perde un bon musico y cantante.
Cado su amor pa cultura, musica tipico y folklore tabata inmenso. Esey tabata locual cu semper el a cuida manera un Tesoro Nacional. E tin un trayectoria hopi largo mes den e mundo di musica y recuerdonan bunita lo keda graba den curason y mente di hopi persona na Aruba y di tur esnan cu a stim’e.
Un colega cu hopi a stim’e tambe y siña aprecia.
Awe Aruba su cultura y e musica folklore ta perde un di su maximo exponente.
Departamento di Cultura Aruba ta di luto y conmovi cu supartida. Awor Cado ta bay forma parti di e orkesta tipico celestial di nos Señor.
Danki Ricaldo Cado van der Biezen pa tur loke cu a haci, dedica y promove nos cultura tanto internacionalmente como local den comunidad di Aruba.
Cu Cado sosega na paz den Reino Celestial.
Compila pa sr. Ricky Kock y Stanley Dabian
Stan Dabian, PR-DCA
DCA/RickyK/StanD
