Diabierna e Centro di Rescate y Coordinacion di Guarda Costa a recibi informe di e toren di autoridad portuario di Curaçao cu den oranan di mainta nan a ricibi un mensaje di e capitan di e barco Norwegian Pearl, cual tabata mara na e megapier di Curaçao, di cu un barco a sink cerca di e barco. E capitán no a duna declaracion di e personanan a bordo na e toren di e waf. Inmediatamente despues di e informe di e toren di e waf, RCC a pone nan mes den contacto cu e capitan di Norwegian Pearl pa obtene más informacion di lo sucedido. E capitan di e crucero a manifesta cu un boto a sink cerca di e crucero y cu 2 homber cu hemchi a landa bay na e zona unda e casitanan dibe piscadonan ta ubica. A dirigi un di e botonan patruyero di Guarda Costa cu urgencia na e sitio pa busca esnan cu tabata abordo di e boto cu a sink. Na nan yegada a bin topa cu un boto piscado rumbo e 2 hombernan landando, ora guardacosta a topa cu e 2 hombernan landando a bisa cu nan tabata piscando na e momentonan ey un ola a bolternan y e boto a cuminsa sink mesora. Usando e chaleconan salvavidas nan a landa rapidamente na canto pa pidi ayudo pa nan boto, pero una vez nan a regresa na e sitio, e boto a desaparece den lama. Afortunadamente, e 2 personanan aki tabata den bon estado di salud y a regresa canto sano y salvo, lamentablemente sin nan boto.