ORANJESTAD – Minister Maduro tabatin un reunion fructifero hunto cu Minister di Asuntonan Economico di Corsou, Minister Giselle Mc William durante cual a discuti algun punto di importancia pa cu e cooperacion economico entre Aruba y Corsou.
Certificado di Origen
Minister Maduro ta anuncia cu hunto cu Minister Mc William a yega na un consensus riba e Certificado di Origen. Esaki ta un formulario cu lo facilita e comercio entre Aruba y Corsou. Antes tabata usa un formulario di Europa, cu awor lo bira obsoleto.
E Certificado di Origen lo ta di un forma digital pa asina facilita e proceso di comercio y lo drenta na vigor entrante 1 di januari 2020. E formulario aki lo wordo usa den cuadro di e zona di comercio liber entre Aruba y Corsou. E mandatario a enfatisa cu esaki sigur ta un bon noticia pa e comerciantenan di Aruba y Corsou.
Onderlinge Regeling Vrijhandel
Minister Maduro a informa tambe cu a finalisa e proceso di negociacion di e zona liber di comercio entre Aruba y Corsou pa asina pronto por firma un Onderlinge Regeling Vrijhandel. Esaki ta encera cu productonan cu ta wordo traha na Aruba por wordo exporta sin barera na Corsou y vice versa.
Esaki ta un noticia positivo pa economia di Aruba y Corsou, ya cu esaki lo genera mas actividad economico y tin oportunidad pa crea mas trabou.
Conectividad maritimo entre e islanan y Fast Ferry
A reuni tambe cu Minister President sra. Evelyn Wever- Croes y Minister Chris Romero pa asina por a discuti e posibilidad di por haci uso di e conectividad maritimo di e barco Don Andres.
Esaki ta e barco cu ta navega entre e islanan ABC. Pronto Don Andres lo bay cuminsa cu su ruta nobo for di Sto. Domingo pa Corsou pa asina por trece fruta y berdura for di Sto. Domingo pa Corsou y cu Aruba por haci uso di e oportunidad aki.
Alabes a discuti e desaroyo di e proyecto di Fast Ferry y Minister Mc William a informa cu e parti financiero a ser regla y cu pronto e ta spera cu por formalisa esaki.
Minister Maduro ta sumamente satisfecho con e reunion a bay. Varios punto a ser trata pa asina awor por sigui traha pa concretisa esakinan. E mandatario a gradici Minister Mc William y su conseheronan pa a tuma e iniciativa pa bini Aruba pa asina por a atende e puntonan di importancia aki.Tambe e dignatario a gradici expertonan di Departamento Economico y di Aduana cu a guia e proceso.
