ORANJESTAD – Minister Maduro ta informa cu den luna di augustus e sistema financiero di Aruba ta bay wordo evalua pa e organisacion Caribbean Financial Action Task Force (CFATF). CFATF ta un organisacion regional di e entidad intergubernamental Financial Action Task Force (FATF) cu Aruba ta miembro di dje. FATF ta un organisacion cu ta dedica su mes na desaroya principionan di maneho pa promove y salvaguardia integridad di e sistema financiero mundial contra labamento di placa y financiamento di terorismo. Meta di e evaluacion aki ta pa revisa e integridad di e sistema financiero di Aruba pa locual ta trata vulnerabilidad di labamento di placa y financiamento di terorismo. E ultimo evaluacion di Aruba pa FATF tabata na aña 2009 y awor Aruba ta na turno pa wordo evalua pa e organo regional CFATF.

Preparacion pa e evaluacion

Varios instancianan local a cuminsa prepara pa e evaluacion aki for di aña 2018. Aruba a pasa door di un proceso intensivo pa identifica y evalua su riesgonan nacional riba tereno di labamento di placa y financiamento di terorismo  pa asina presenta e ’National Risk Assessment’ (NRA). Un resumen di e resultado di e evaluacion aki ta publica riba www.gobierno.aw. Alabes varios instancia a haci trabounan pa compila e ‘Effectiveness Document’. E documento aki ta pa duna e evaluadonan informacion di tur e proceso, procedura y estadisticanan di Aruba riba e tereno di prevencion y combatimento di labamento di placa y financiamento di terorismo, pa nan por evalua si Aruba ta trahando efectivamente riba e tereno aki. Pa e evaluacion aki ta exitoso ta rekeri un cambio di Ley entre otro den e Ordenanza pa Prevencion y Combatimento di Labamento di Placa y Financiamento di Terrorismo (LWTF) cu pronto lo mester wordo trata pa Parlamento di Aruba.

Gradicimento

Minister Xiomara Maduro ta gradici e grupo di profesionalnan cu ta traha diligentemente pa e evaluacion di Aruba pa CFATF por tuma luga durante e periodo di 30 di augustus pa 10 di september proximo.