Otro acto criminal a tuma lugar na San Nicolas y atrobe morto a cay. Lo mi haya critica si awor mi menciona cu mi a adverti desde un tempo caba pa inverti den seguridad di nos pueblo y señala cu pa crea seguridad ta necesario mas polis y tambe mehora e situacion na San Nicolas.
Lo mi wordo declara persona non grata si mi declara cu entre otro e motibo principal pa e situacion precario cu San Nicolas ta experencia for di hopi tempo caba, tin di haber cu negligencia y falta di boluntad pa trece un cambio concreto y no manera ta sosode cada 4 aña cu promesanan fofo. Y si ami como habitante di San Nicolas tribi na exigi pa gobernantenan dedica tempo y placa pa mehora e situacion na San Nicolas, anto diripente mi ta egoista pasobra tur bario tin e mesun derecho pa un desaroyo sostenibel.
Realidad ta cu nos aki a wordo lubida y nos unico “balor y uso” ta pa cada 4 aña nos vota pa esnan cu nunca a demonstra interes ni boluntad pa haci e cambio cu ta tanto necesario bira posibel y cu nos di Pariba di Brug ta anhela tur dia. Ta papia cu Hulanda ainda kier sigui colonisa e parti di e islanan den Caribe, pero e mesun tipo di colonialismo ta existi tambe riba Aruba mes. Nos no ta wordo mira como parti di e isla, pasobra nos supuestamente lo tin otro background cultural y hasta ta wordo menciona tray cortina cu nos mes ta e culpabel pasobra nos a nenga di ta forma parti integral di e cultura y bida di Aruba. It was always we and them supuestamente.
San Nicolas segun tur investigacion cu a tuma lugar ta e districto cu mas pobresa, mas criminalidad, mas problema social y mas cas di pueblo. Ta dificil pa mantene un negoshi Pariba di Brug, pasobra mayoria di e comercio ta sosode Pabou di Brug. Nos por a ripara con entre otro WEMA cu a cuminsa na San Nicolas, masha liher a hay’e obliga pa habri negoshi Pabou di Brug. Recientemente e compania di e presidente di San Nicolas Business Association, tambe a habri un sucursal pabou di Brug. E cantidad di supermercado na San Nicolas ta un fracion masha chikito di e totalidad di supermercado na Aruba. E motibo principal ta, falta di siguridad y falta di inversion den comercio Pariba di Brug.
E solucion pues pa combati criminalidad no ta unicamente represion, esta mas polis, pero prevencion. Prevencion mester bay man den man cu for once and for always politica na Aruba siña descubri San Nicolas di nobo y laga colonialismo un banda. Nos tambe tin nos soño pa mira un San Nicolas florece manera ta sosode cu e resto di Aruba. Ami Val Peterson lo sigui vigila e desaroyo na San Nicolas di cerca y denuncia cada negligencia den e proximo añanan.
