![](https://www.awe24.com/wp-content/uploads/2021/05/4D9AEA8F-DAC9-4C41-BD59-A5F651EF8E01-640x334.jpeg?v=1621512665)
![](https://www.awe24.com/wp-content/uploads/2021/05/4D9AEA8F-DAC9-4C41-BD59-A5F651EF8E01.jpeg)
Dialuna Prome Minister Evelyn Wever – Croes a duna update di reunionnan andando entre Aruba y Hulanda. Actualmente ta den consulta cu Hulanda riba dos trayecto esta: (1) e lands pakket y e uitvoeringsagenda pa e di tres kwartaal di 2021, (2) y tambe e COHO.
Na luna di juni lo mester determina e uitvoeringsagenda pa e tercer kwartaal pa por bin na remarke pa e sosten di likides cu Aruba mester pa di tres kwartaal di e aña aki.
Algo positivo, Prome Minister a indica, ta cu Aruba su economia ta recuperando. April y mei tabata un luna hopi bon pa turismo. Institutonan a indica cu turismo ta recuperando cu 50% caba. Pero como cu no a yega100% ainda nos ta depende keto bay riba e sosten di likides di Hulanda. Pa loke ta e uitvoeringsagenda, no ta premira cosnan hopi dificil pa cumpli cu ne, pero si tin, nan ta wordo delibera cu stakeholders pa por yega na un consensus.
Situacion Gobierno demisionario
Teniendo na cuenta cu Lands Pakket ta un palabracion cu ya ta haci y e sosten di likides ta necesario pa henter Aruba por ricibi 1 di juli, e ta importante pa por firma pa Aruba ricibi esaki.
Pa loke ta e ley di COHO y RAFT, Premier Wever – Croes a splica cu ta na mesa cu Hulanda den negociacion cual ta bayendo den bon direccion. Tin un trayectoria largo dilanti ainda pa ambos ley pero ta trahando riba dje na mesa.
Situacion carta di Hulanda pa Corsou y Sint Maarten
Prome Minister a enfatisa cu no tin motibo pa ta nervioso aki na Aruba pasobra Aruba tin un otro approach pa loke ta Hulanda, Lands Pakket y COHO. Aruba a bati na porta di Hulanda pa presta placa y a ricibi esaki na 0% y a sigui na mesa pa papia di e condicionnan.
“No ta tur e condicionnan di Hulanda ta di acuerdo cu ne, pero ta sigui na mesa y purba yega na otro. Na fin di dia, pueblo di Aruba ta den necesidad.”
Si tuma nota di e carta cu Secretario di Estado sr. Knops a manda pa e lidernan nobo di e Gobierno cu tin cu bay forma na Corsou, e ta cuminsa pone presion. Pues si nan no sinta na mesa, lo nan no tin sosten di likides.
Pa locual ta e carta dirigi na Sint Maarten, tumando nota di e carta aki, ta mira cu un bes mas Hulanda ta pone presion y ta agrega cu no ta duna sosten di likides si no cumpli.
P’esey ta hopi importante pa Aruba realisa cu mester di e cen aki. No mester baha cabes y acepta tur cos, al contrario, mester keda na mesa y papia di e tema y wak unda ta yega na otro. P’esey tambe ta importante den e periodo aki di campaña pa politiconan no gaña cu nan tey pone COHO un banda y kibra tur palabracion.
Den e caso cu esey sosode e no lo ta na beneficio di Aruba”, Premier Wever – Croes a termina bisando.