E importancia di Polinisacion
ORANJESTAD – Ora di papia di abeha, mayoria hende no sa cu nan ta un especie esencial cu ta responsabel pa sobrevivencia di varios ecosistema. E Abeha ta un polinisado mescos cu barbuletnan, parhananan y raton di anochi. Tur e especienan aki,algun protegi y otronan no protegi, ta constantemente bou menasa di actividadnan humano y p’esey nan cantidad ta bahando drasticamente.
Pa e motibo aki Directie Natuur en Milieu (DNM) ta hay’eimportante pa para keto na e dia di observacion, Dia mundial di Abeha (World Bee Day), awe 20 di mei. DNM ta hay’eoportuno pa crea mas conscientisacion y trece padilanti kico tur nos por haci pa sostene, restaura y engrandece e rol di e polinisadonan manera esun di e abeha.
Dicon polinisacion di abeha ta importante? Polinisacion di abeha ta contribui directamente na produccion di cuminda y e preservacion di biodiversidad en general. Polinisacion kiermen e hibamento di polen (stuifmeel) di un mata pa otro pa fertilisacion tuma lugar y asina matanan por reproduci y haya nan frutanan cu ta contene e simiya di e mata. Di e manera akimatanan por duna fruta y berdura pa hende y bestianan come. E simiya lo fungi despues pa un otro mata nace.
Abo por imagina un mundo sin chuculati of koffie? Dificil berdad. Wel, esey lo ta igual na un mundo sin e polinisadonan manera abeha. Polinisadonan tambe ta duna un refleho di un medio ambiente saludabel y den balans. Ademas di abundancia di cuminda y nutricion, polinisadonan ta contribui na medicina, produccion di fibranan of otro materialnan. Abeha ta produci algo cu nos tur gusta, ta saludabel y ta bon pa nos, honing.
Algun di e menasanan y problemanan cu e poblacion di abeha ta enfrenta cu ta causa cu nan cantidad ta baha ta: uzo di pesticida no biologico, malesanan cu ta afecta especienan, perdida di habitat y temperatura mas halto debi na cambio di clima. Tur esakinan ta actividadnan di hende cu ta forma menasa pa populacion di abeha.
Algun di actividadnan cu nos por haci pa yuda e populacion di abeha aumenta ta entre otro:• Planta mas mata of esunnan cu ta floria• Cumpra honing di produccion local• Evita uzo di pesticida den cura • Proteha casnan di abeha• Consulta un imker (criador di abeha) pa haya sa mas di cuido di abeha• Aporta mas na conscientisacion. Comparti e informacion manera esun aki cu comunidad.
Fact: 90% di matanan ta depende di polinisacion. Un abeha por bishita 50 te 1000 flor den un biahe. Saca bo som; Si un grupo di 25,000 abeha haci dies biahe den un dia, e abehanan por polinisa un averahe di 250 miyon flor den un dia.
DNM ta haci un yamada riba cada un di nos pa NO mata of fumiga grupo di abeha. Por yama un imker cu ta bin busca y ta coy e abehanan den cahanan asina crea produccion local di honing pa bende.
