ORANJESTAD – Dialuna mainta Minister Maduro tabata den Parlamento den un Encuentro Publico pa asina brinda informacion riba finanzas publico di nos Pais. E mandatario encarga cu finanzas a presenta un Nota di Fin di Aña 2019 (Najaarsnota 2019) na Parlamento den cual ta anticipa riba e cambionan den Presupuesto Supletorio pa 2019.
Den su disertacion ela trece dilanti cu Gabinete Wever-Croes a demostra diciplina financiero y ta kedando den e apoderacion cu Parlamento a duna den Presupuesto 2019. Gobierno a ricibi 14.28 miyon mas na entrada, pero tabata tin 11.31 miyon mas na gasto di cual 8.3 miyon tabata pa e pago extra di reparatietoeslag. Asina mes e resultado preliminar ta mustra di ta mihor cu premira, e deficit pa 2019 ta mas chikito, 20 miyon enves di 25 miyon y e deficit colectivo ta na 0.07% enves di 0,5% cual ta e norma acorda den cuadro di supervision financiero di nos Pais.
Henter nos pais ta haciendo e cambio necesario y instancianan internacional a y ta sigui evalua esaki y poco poco nos pais ta ganando e confiansa y e rapport positivo manera IMF, S&P y Fitch Rating ta muestra di esaki. Esaki ta un maneho cu ta beneficia Aruba completo caminda ta recobrando e credibilidad financiero local, den reino y internacionalmente, cual disciplina financiero nos mester sigui cune. Minister Xiomara Maduro ta trece dilanti cu ta nos mes como pais mester drecha nos asuntonan na un manera factibel, no por drecha un caminda y daña otro caminda. Tin bez decisionnan no ta popular, pero ta necesario y mester tin e corahe pa tuma decision y despues di dos aña di trabaonan inmenso nos ta logra haci e cambionan necesario pa yega na un presupuesto balansa y awor rumbo pa un presupuesto cu surplus. Esakinan ta esfuersonan di nos pais cu nos mester sa di balora. Den un forma transparente a bin informa Parlamento kico ta e avancenan financiero y cu Aruba ta cumpliendo y ta noticianan cu pueblo mester sa y cu Parlamento mester ta debidamente informa.
Minister Xiomara Maduro ta gradici Parlamento, coleganan di Conseho di Minister, tur departamento di Gobierno y Pueblo en general pa e esfuerso conhunto pa demostra e diciplina financiero necesario pa asina hiba Aruba riba e caminda di un finanzas publico manehabel y sostenibel.
