ORANJESTAD – Aruba, 27 Maart 2021:– Luna pasa Aruba Hotel and Tourism Authority (AHATA) a manda un carta pa DAO y SVb cu copia pa gobernantenan concerni, pidiendo clarificacion riba un asunto importante tocante maneho di vakantie pa empleado na compania cu ta ricibi subsidio di salario.
Durante un conferencia di prensa di SVb aña pasa, a duna un interpretacion di maneho di vakantie cual den practica lo crea mas gasto y un complicacion enorme di administracion pa dunado di trabou. E interpretacion tabata cu ora di tuma vakantie, e porcentahe di e dianan igual na porcentahe di salario cu ta subsidia no por conta den administracion; kiermen lo keda debe dia extra di vakantie na e empleado.
Na 2021 e confusion tocante e anuncio di SVb a haya mas atencion, pasobra algun empleado a cuminsa exigi pa dunado di trabao sigui e interpretacion di SVb.
Den e carta di AHATA, fecha 20 di februari, a splica pakico e interpretacion di SVb no ta cuadra cu realidad y a pidi DAO y SVb pa duna clarificacion. Despues di 2 siman a manda un carta recordatorio, pasobra no a ricibi un contesta ainda. Awor ta un luna despues y ainda DAO y gobierno no a ofrece e claridad necesario na dunado di trabou.
AHATA ta lamenta e falta di responsabilidad di parti di gobierno y e departamentonan concerni pa ofrece e clarificacion, cual ta señala un falta di comprension pa e inkietud cu incertidumbre ta crea entre dunado di trabao y trahado. Un departamento gubernamental di labor cu ta responsabel pa cumplimento di ley di labor, mester ofrece solucion pa evita conflicto na pia di trabao y mester representa interes di dunador di trabao igualmente cu di trahado. Ademas, ta lamenta con e interpretacion publica ta contradeci e meta di subsidio di salario, cual ta pa sostene compania y reduci nan gasto.
