ORANJESTAD, ARUBA – E siman aki Fundacion Parke Nacional Aruba (FPNA) a cuminsa cu e ultimo fase di e plan reorganisatorio cu ta forma parti di e mitigacion di e impacto financiero relaciona cu e crisis economico / financiero cu e pandemia di COVID-19 a trese cune pa Aruba henter.
Di un manera diligente y capas e Hunta di Directiva di FPNA cu aprobacion di e Hunta di Supervision a tuma e pasonan necesario durante aña 2020 pa mitiga e efecto financiero. Esaki a wordo haci pa garantisa e continuidad di e trabou di conservacion di Aruba su naturalesa. E impacto di COVID-19 a afecta e fuentenan di entrada di e fundacion, caminda cu Gobierno di Aruba a reduci nan subsidio cu 12.6%. Tambe e entrada di bishitante ricibi na Parke Nacional Arikok a cai cu un averahe di 70% compara cu 2019.
Hunto cu e ehercicio pa reduci e gastonan operacional mas tanto posibel, FPNA ta sigui tuma pasonan necesario na bienestar di e fundacion y tur empleado. Desde juli 2020 e empleadonan di FPNA a entrega 8.5% di salario. Durante e prome lunanan di 2021 tabata tin varios reunionnan cu trahado di FPNA, y cu sindicato SEPPA y Landsbemiddelaar, y asina a yega na un acuerdo mutuo pa ahusta salario di empleado cu un reduccion total di 15%.
FPNA tambe a inicia un proceso di ofrece pakete boluntario di cual 11 trahado a haci uso si esaki. Tambe algun trahado a wordo ofreci un cambio di funcion, y algun a tuma esaki. Pa algun otro trahado FPNA lo mester pidi ontbinding pa asina por finalisa e ‘afvloeiingsplan’. Cu e mitigacionnan aki FPNA lo por evita un situacion financiero precario. Awo cu menos trahado, FPNA lo sigui tuma pasonan necesario pa yega na un finansa sostenibel. Nos dilanti FPNA lo bai enfoca riba desaroya y modernisa procesonan di trabou: con por traha mas eficiente y na mes un tempo mehora e calidad di servicio.
Cu cifranan ricibi di ATA, FPNA ta monitor y midi tur luna e cantidad di bishitante cu ta bishita Aruba den comparacion cu Parke Nacional Arikok. Pa e ultimo añanan Parke Nacional Arikok tabata ricibi un averahe di 10% di turista cu ta bishita Aruba. Desde e introduccion di e maneho di ATV/UTV y tambe e pandemia di COVID-19 e cifra aki a baha cu un averahe di 1.5%, cual ta haci cu actualmente 8.5% di turista cu bishita Aruba ta bishita Parke Nacional Arikok. E team di maneho ta den proceso di formula un plan comercial nobo pa recupera e perdida di e 1.5% mas alinea cu e pensamento di un recreacion sostenibel cu ta den balansa cu naturalesa. Fundacion Parke Nacional Aruba ta gradici e comunidad di Aruba pa e sosten durante e proceso di recuperacion.
