ORANJESTAD – Durante su ultimo reunion miembronan y personal di Algemene Rekenkamer a despedi di sra. drs. Lay Hing de Kort-Yee, como miembro fiho di dicho organizacion. Durante e periodo di 22 november 2017 pa 23 di februari 2021 Sra. de Kort-Yee, a dedica su conocimento y passion pa defende e interes general di comunidad di Aruba.

Pa medio di e investigacionnan di Algemene Rekenkamer, como organo halto di control di Pais Aruba, Parlamento por pone cada minister responsabilisa su maneho ehecuta.

Cu e despedida di Sra. de Kort-Yee, e proceso pa haña candidatonan capacita y adecuado a bira mas urgente. Candidatonan mester por cumpli cu exigencianan conforme Ley di Algemene Rekenkamer (AB 1998 no. GT 20) y pasa tambe entre otro un assessment. Despues di ricibi resultado di e assessment, Algemene Rekenkamer ta tene un combersacion cu cada posibel candidato qualifica. A base di e resultado di e assessment y combersacion, Algemene Rekenkamer mester haci un proposicion na Parlamento di por lo menos 3 candidato cu lo ta qualifica.

Ta spera pa final di april proximo por logra haci un proposicion. Si esaki no logra of no ta exitoso, lo informa Parlamento di e resultado di e proceso pa haya candidatonan capacita y adecua.

Algemene Rekenkamer ta desea Sra. drs. Lay Hing de Kort-Yee hopi exito den su futuro carera.