Diabierna anochi a drenta informe di un accidente basta pisa cu hende herida y pega den auto na Camacuri, mesora a dirigi tanto polis, ambulans como tambe e equipo di rescate di bombero. Na yegada di e patruya a bin compronde cu aki ta trata di un Nissan Sentra bayendo direccion pariba cu velocidad halto a bay pasa un auto pero esaki a ser’e di tal forma cu ela perde control, baha caminda na man robez y a bay dal riba un mata di kwihi. E impacto tabata basta fuerte y tanto e chauffeur como e dama pasahero a resulta herida. Na yegada di e ambulans nan a atende e chauffeur cu tabata keha di dolor di lomba mientras e dama pasahero sinta na banda su cara tabata na sanger, na prome instante a kere cu e dama lo tabata pega pero e personal di ambulans a logra saca e dama. Na yegada di e equipo di rescate di bombero ya nan presencia no tabata necesario mas pa corta e auto pa saca e dama.
