Union Civil A Pasa Sin Consulta cu Pueblo

Recientemente union civil a keda aproba pa nos Parlamento cu 17 voto na fabor y 4 contra. Mas cu dos terecera parti di nos Parlamento tabata di acuerdo cu union civil. E pregunta ta si mas cu dos tercera parti di nos pueblo kende Parlamento ta representa ta di acuerdo cu union civil. 

Miembronan di Parlamento actual hunto a acumula un total di 19.434 voto, esaki ta 33% di e votonan emiti durante ultimo eleccion. Parlamento a dicidi riba un tema asina crucial basa riba solamente un representacion di un tercera parti di esnan cu a vota biaha pasa. 

E Parlamentarionan cu a vota na fabor di union civil tin un total di 17.421 voto. Esaki ta solamente 24.6% di tur esnan cu tabatin derecho di vota na 2017, of 29.7% di e votonan valido na 2017. Pa e motibo aki Iglesianan Cristian tabata boga pa un sondeo serio tuma luga tocante opinion di pueblo riba un asunto asina serio manera union civil. 

Iglesianan Cristian di Aruba kier a expresa un palabra di elogio na e cuatro Parlamentarionan cu a vota contra pasobra nan ta convenci cu un materia di e seriedad aki ta rekeri un consulta directo cu pueblo. 

Loke ta sobra pueblo awor ta den e siguiente eleccion expresa su aprobacion of desaprobacion di e manera con e Parlamentario cu ta represent’e a vota dia 1 di maart 2021. Kisas e persona cu bo a vota p’e na 2017 no a drenta Parlamento, pero bo voto si a pone cu un persona a drenta Parlamento cu kisas si a vota na fabor di union civil. 

Nos ta sigui pidi Dios duna nos gobernantenan y nos representantenan den Parlamento e sabiduria necesario pa sigui guia nos pais den bon caminda. 

Comision di Pastornan den representacion di Iglesianan Cristian di Aruba.

3 di maart 2021