Sucu adicional
IBiSA ta informa en conexion cu Dia Mundial di Diabetes (14 november) E habito di come demasiado sucu ta malo pa bo salud y di bo yiunan. E sucu ta acumula den forma di vet den bo curpa na luganan cu nos no por wak. Esaki por causa sobrepeso y otro malesanan serio manera diabetes tipo 2. Dia pa dia e edad cu ta constata diabetes tipo 2 ta baha. Malesa di curason y algun cancer ta birando mas comun. Door di descuido y come demasiado sucu specialmente serca mucha por causa dolor inmenso di djente cu ta putri.
Kico kiermen “added sugar”?
Ora nos papia di sucu adicional, nos kiermen sucu cu ta pone extra pa haci bebida of cuminda mas dushi. E por ta agrega door di e fabricante di cuminda, coki of chef, of abo mes na cas. No ta solamente sucu agrega na bo te of koffie – pero tambe por ehempel honing. Otro producto tambe por contene sucu agrega manera cierto juice, bolo, snacks, refresco, cuki, yoghurt.

Scohe sabi
Fruta Scoge pa fruta na luga di cos dushi/dessert. Fruta ta contene sucu natural, vitamina C, antioxidante, mineral y fibra. No por come sin mas si ta un diabetico. Recomedacion ta pa come 2 porcion pa dia. Fruta seco (dried fruit) tambe ta contene sucu natural, y e cantidad cu por come di esaki ta ¼ cup.

Lechi y yoghurt plain Lechi of yoghurt plain no tin sucu agrega den dje. Pero si ta contene sucu natural. Un diabetico mester tene cuenta cu esaki. Por agrega fruta fresco of fruta seco pa dune un sabor zoet.

Juice y smoothies Juice 100% no ta contene sucu adicional pero e tin sucu natural di e fruta. Corda limita esaki pa no mas di 150 ml (un glas chikito) pa dia. Si bo ta gusta batido di fruta of smoothies, preferibel traha esaki na cas y no agrega sucu na dje.

IBiSA ta informa en conexion cu Dia Mundial di Diabetes (14 november) algun tips pa baha e consumo diario di sucu.

DIY (do it yourself) snack
Puntra bo yuinan pa hunto prepara un snack saludabel. Uza por ehempel fruta, cereal cu menos sucu y noot sin salo. Cu nan participacion nan lo ta mas dispuesto pa come e snack saludabel.

Lag’e riba e reki di supermercado

E triki aki ta simpel! Si bo no tin buscuchi dushi, chuculati of otro dessert den cas, bo no por come nan! Dus laganan den supermercado.

Pimp bo yogurt

Scoge un yogurt cu menos vet y sucu en bes di un yena cu sucu, ijscream of otro desert cu sucu agrega. Haci bo yogurt mas interesante door di pone algun fruta fresco of seco den dje manera blueberry of rasenchi.

Juice di fruta

Limita esaki na un glas chikito of 150 ml pa dia. Den e forma aki bo ta haya sucu natural pero bo no ta surpasa bo 2 fruta pa dia. Pone atencion riba e pakete cu e ta 100% juice. IBiSA su recomendacion: come un fruta y bebe un glas di awa na luga di bebe juice.

Scohe pa bacoba

Purba pone algun slice di bacoba riba bo toast di pan integral of crackers integral. Den e manera aki bo curpa ta haya su sucu desea y plus e ta haya su fibra, vitamina y mineral.