Diabierna ultimo, Prome Minister Evelyn Wever-Croes tabata tin e prome reunion cu director nobo di Elmar, Anthony Irausquin hunto cu presidente di hunta di directiva di Elmar, Shonno Maduro. Sr. Irausquin a duna splicacion amplio di su plannan pa garantisa un futuro estable di Elmar y su empleadonan. 

Sr. Irausquin ta e prome director riba cual e Wever-Croes-Norm ta wordo aplica. Manera ta conoci, den ultimo añanan, ta biba un desgusto den comunidad cu tin directornan di companianan estatal ta gana salarionan exorbitante. 

Gabinete Wever-Croes a declara desde principio cu e tipo di situacionnan aki no por continua y a cambia e maneho: ningun director di compania por gana mas cu 130% di e salario di un minister. Prome Minister a indica cu e maneho aki lo wordo aplica caba pa directornan cu wordo nombra nobo y señor Irausquin ta e prome. 

“Companianan estatal ta di pueblo y nan no tey pa enrikece ningun hende. Nan mester sirbi pueblo y comunidad. Nan mester garantisa sueldo di trahadonan cu ta traha cu alma y cuerpo pa e companianan por brinda servicio. Gabinete Wever-Croes no ta papia so, nos ta actua tambe! Mi a keda hopi impresiona y satisfecho cu e reunion y di por mira cu tin un vision y cu den e vision nobo di Elmar e ser humano ta central”, Prome Minister Evelyn Wever-Croes a expresa.