Sr. Knops a declara cu e gobernacionnan di e ultimo 10 aña ta e motibo principal cu Aruba a cay den un decadencia financiero y economico. E pandemia a simplemente acelera y desenmascara e mal gobernacion. Consecuencia di esaki ta cu awor nos ta un pais sin tera ni bandera, na unda democracia, moralidad y husticia a para bira palabranan sin contenido y na final a claba e cuchiu di traicion den corazon di nos Status Aparte ora restablece e federacion Antiyano, pero medio di COHO. Si como paisnan autonomo nos por a yega na cierto formanan di cooperacion, awor pa medio di protocol y acuerdonan ta obliga, por medio di COHO, pa bin cooperacion den paisnan Caribense, e.o. riba tereno medico, djis pa cuminsa.

UPP a bin caba ta acusa abiertamente e falta di liderazgo, un falta enorme di vision y amor patrio cu enbes di reinforsa nos regla y leynan a prefera di apoya corrupcion, abuso di poder y malversacion di fondonan publico. Despues di 8 aña cu nos pueblo tabata testigo con e gobierno anterior di AVP a desangra nos finansas publico, a carga speransa cu e coalicion POREDmep, cu a asumi e encargo pa goberna nos pais, lo por a ehecuta tur palabra bunita y promesanan haci durante campaña. E realidad amargo ta cu e gobernacion actual a defrauda nos pueblo cu un maneho sin pia ni cabes. Unda hasta no a ria pa apoya diferente casonan dudoso y comportacion eroneo di cierto miembronan di e  partidonan di e coalicion.

Pa cuminsa ta e caso di Serlimar. UPP a acusa abiertamente corupcion y a hasta entrega un keho oficial na Ministerio Publico contra e ex-minister, kende tabata haci y deshaci den e gobierno sin cu ningun alma tabata tin e pudor di contradeci su persona. Y esun cu a haci’e a wordo expulsa di e partido.

Ta insolito e salario barbaro di 15.042,50 florin, mas beneficionan manera huur di 2.500 florin y gastonan extra a razon di 607.50 florin pa luna cu e ex-director di Serlimar tabata haya pa luna. Un Serlimar cu de hecho tabata bancarota. Ora cu e minister cu a tuma e encargo over di e mandatario corupto, gobierno, ayuda pa parlamentarionan di coalicion, a haci todo por todo pa core cu su persona. A logra cu nan proposito haciendo uso di tacticanan cu UPP a categorisa como abuso di poder. Igualmente a peca contra nos nos leynan, manera ta e caso di e accion di e presidente di parlamento na momento di votacion. Ningun musca no a bula.

Recientemente UPP a publica un veredicto di un hues na unda di un forma cla a denuncia patronahe politico y malversacion di fondo publico. Den su sentencia e hues a vendica sra. Marisol Lopez-Tromp completamente y a desenmascara publicamente un gobierno cu ta apoya corupcion.

E tristo di henter e situacion ta cu te awor ni gobierno, ni Parlamento, ni OM ta haciendo algo cu cosnan cu no ta corecto y cu ta hole sea na patronahe, corupcion y trapamento di nos constitucion y nos derechonan como ciudadano. Desde 2018 nos a mustra riba loke ta pasa den Serlimar, cu documentonan cu Parlamento tambe tabata tin. Nos a mustra riba e caso di incinerator chikito, unda cu a entrega keho. Nos a mustra riba e fayonan barbaro na nivel di parlamento cu pa UPP ta actonan penal a wordo cometi, pa core cu un minister. Nos a trece e caso di 23 di december 2020 na unda cu dilanti juez ta keda demostra cu tin politica di patronahe cu a tuma lugar y na unda cu placa di pueblo ta wordo uza malamente. Y no lubida riba e hecho cu informacionnan secreto di pashentnan tabata riba caya y a priminti investigacion boca grandi y te awe nada, pasobra lo tin hende cerce di minister ta involvi?

Y riba tur esakinan gobierno y nos Parlamento, kendenan ta haci nan mes complice, ta keda keto!

Ta e malgobernacion aki ta hinca nos den un posicion na unda cu no solamente nos a perde nos autonomia, pero loke ta haci nos pueblo y sigur UPP mas dolor, ta cu esaki ta duna Hulanda e oportunidad pa logra atrobe institui e federacion Antiyano di antes. Aruba lo atrobe mester doblega pa un gobernacion central na unda nos lo tin poco bos. Y esey ta e siguiente stap den cuadro di COHO!

Lider di UPP

Booshi Wever

10 di februari 2021