Ta miho pa laga esnan responsabel duna informacion prome cu core saca conclusion sin ta sikiera bon informa
ORANJESTAD – Despues di a scucha Sindicato SPA trece su splicacion y preocupacion dilanti caminda Sr. Dirks ta bisa cu ela lesa e Landspakket y cu eyden ta poni cu BBO ta bira dobbel y cu ta bay dollarisa na Aruba. Minister Maduro ta reacciona cu e informacion treci aki no ta cuadra cu realidad. Ningun caminda ta poni cu BBO lo redobla ademas un BTW no ta un BBO cual ta dos impuesto full diferente. Ningun caminda ta poni cu lo bay introduci dollar na Aruba, otro informacion cu no ta berdad. E realidad ta cu ta bay haci un investigacion y esaki ta wordo haci despues di aña 2022.
Minister Xiomara Maduro ta trece dilanti cu no ta corecto y tampoco responsabel pa un lider sindical meymey di un pandemia bay crea panico innecesario den Pueblo treciendo informacion cu no ta berdad. Ta miho pa laga esnan responsabel pa trata cu e Landspakket aki duna informacion prome cu core saca conclusion sin ta sikiera bon informa.
E mandatario ta sigui trece dilanti cu Gobierno a firma e agenda di ehecucion di e Landspakket pa e prome kwartaal dia 1 di februari y dia 3 di februari a bay Parlamento pa splica ampliamente kico e agenda ta encera. Por ultimo Minister Xiomara Maduro a indica cu mester brinda espacio pa cada ken haci nan trabou.
