Diahuebs merdia a drenta informe di un accidente cu hende herida na Bubali pabao di Boegoeroei, mesora a dirigi tanto polis como ambulans na e sitio. Na prome vista a kere cu aki ta trata di un accidente di cadena pero na yegada di e patruya a bin compronde cu aki ta trata di 2 accidente tras di otro. E accidente a sosode asina aki cu e chauffeur di e Kia Cerato no a regula su velocidad ni a mantene distancia a bay dal tras di e Kia Picanto cu tabata para pa bira na man robez y a dal nan tras. Na e momentonan ey e chauffeur di un Hyundai truck tampoco a regula su velocidad ni a mantene distancia a bay dal tras di e Kia Cerato cu a caba di dal e Picanto su dilanti. Debi na e impacto tanto e chauffeur como e pasahero na banda a resulta herida. E pasahero tabata keha di dolor na su pecho y e chauffeur na su pia. Na yegada di e ambulans nan a atende ambos victima.
