Aruba Bank ta invita comunidad pa contribui na e programa “Stimami Sterilisami”!
Oranjestad – 02 di februari 2021 – Nos pais ta enfrenta un problema grandi di cantidad grandi di cacho y pushinan cu ta biba riba caya, sin hogar adecua. Hopi di e pushi y cachonan aki ta bandona y ta wordo mata diariamente of ta sufri di malesa y hamber riba caya.
Mirando cu e unico solucion pa e problema aki ta reduci e cantidad di cacho y pushi y enfoca riba e responsabilidad di cada doño riba mantencion y cuido di cacho y pushi, e Fundacion Stimami Sterilisami a cuminsa cu su programa di sterilisashon algun aña atras.
Pa yuda e Fundacion y den cuadro di nos responsabilidad corporativo, Aruba Bank ta contento di aporta na e Fundacion pa asina nan por sigi cu nan programa y yuda cubri un gran parti di e gasto di sterilisacionnan pa doñonan y otro fundacionanan
Mirando e importancia di sterilisacion y e bentahanan positivo cu e programa ta trece cune pa e animalnan, manera un bida mas largo, mas resistencia contra malesa, y tambe stop e sufrimento di cacho y pushi di muri di hamber, of di wordo mata den e kill-cage, Aruba Bank ta invita comunidad henter pa yuda frena e problema aki door di sterilisa nan mascota y asina elimina hopi mas cacho y pushi di caya mas liher posibel.
Representante di Aruba Bank, Roxanne Croes a haci entrega di e donacion na representante di Fundashon Stimami Sterilisami den persona di Crescenzia Biemans.
Por haci donacion via cuenta # 6012630190 na Aruba Bank of por bishita nan website: www.stimamisterilisami.com pa mas informacion.
