Diamars 12 november 2019, na Hulanda Minister dr. Armando Rudy Lampe a participa den e ‘Vierlanden Overleg’ ( 4LO) na unda cu tabata presente Minister Plenipotenciario di Sint Maarten sra. J. Wuite, Minister di Enseñansa, Ciencia, Cultura, y Deporte di Corsou, sra. M. Alcala-Walle, Minister di Enseñansa, Cultura y Ciencia di Hulanda, sra. I. Van Engelshoven y Minister Plenipotenciario di Aruba Minister Besaril den nomber di Minister Xiomara Ruiz-Maduro.

 

E 4LO ta un reunion anual entre e Ministerionan ( di Enseñansa) di Reino Hulandes: Aruba, Corsou, Sint Maarten y Hulanda. Durante e 4LO ta discuti topiconan actual y di gran importancia pa cada pais, segun nan necesidadnan y interes comun. E paisnan ta haci diferente palabracion concreto pa loke ta intercambio di data y informacion como tambe colaboracion bilateral of conhunto pa loke ta trata proyectonan y iniciativanan cu por beneficia paisnan den Reino.

 

Minister Lampe, di parti di Aruba a elabora riba proyectonan cu a wordo implementa durante e dos añanan cu a pasa y tur Proyecto cu ta trahando riba dje pa asina e futuro den enseñansa ta mas stabiel y conforme cu meta y desaroyonan mundial.