Minister Xiomara Ruiz-Maduro:
Gabinete Wever-Croes ta presenta Presupuesto 2020 cu un surplus di 29 miyon
ORANJESTAD – Den conferencia dialuna Minister President y Minister di Finansa a anuncia cu Gabinete Wever-Croes a keda cla cu Presupuesto 2020 pa nos Pais y cu despues di hopi aña Aruba ta bolbe conoce un Presupuesto cu un surplus di 29 miyon florin.
Surplus mas recien na 2008 y 2003
Mas reciente Aruba a conoce Presupuesto cu surplus na 2008 di 183.4 miyon y na 2003 di 172.6 miyon bou maneho di un Gobierno di signatura di MEP na man di ex Minister di Finansa sr. Nilo Swaen.
Por cuminsa paga y baha debe
Awor cu Aruba ta conoce Presupuesto cu surplus esaki ta trece nos na un situacion na unda cu Aruba por cuminsa paga su debe y baha esaki. Pa aña 2019 nos debe lo sera na 4323.59 miyon florin cu ta 74.6% di nos GDP, y 2020 ta premira di sera cu un debe 4294,34 miyon florin cu ta 73.4% di nos GDP.
A kibra e trend di subi debe
Di e manera aki Gabinete Wever-Croes a percura pa kibra e trend di crece debe di nos Pais. Aruba awor ta bayendo den e direccion di un finanzas publico manehabel y sostenibel cu ta crea e credibilidad financiero cu tanto nos Pais mester di dje.
Minister Ruiz-Maduro ta gradici Minister President sra. Evelyn Wever-Croes, tur colega Minister, expertonan di Departamento di Finansa y un y
tur cu a yuda cu e trabou di presupuesto 2020. Esaki ta un trabou hopi grandi, ya cu esaki ta determina e direccion cu Pais Aruba tin cu bay pa asina percura pa pone nos economia bek riba pia. Tambe e mandatario a gradici comunidad henter cu a demostra confiansa den e Gobierno aki.
