Secretario di Estado Raymond Knops ta na Aruba entrante 5 y 6 di januari. Durante di su bishita e lo tin reunion cu algun Minister individual y tambe cu Conseho di Minister den su totalidad. E meta di su bishita ta pa atende cu e tema di e landspakketen, pa hunto delibera riba tur e condicionnan den esaki y pa mira unda mester di mas asistencia of clarificacion.

Pa 1 di februari mester yega na un ‘uitvoeringsagenda’, palabracion di ki tempo y ki aña ta bay ehecuta e diferente puntonan den e landspakket. Esaki ta algo cu ya Aruba ta preparando pa presenta di acuerdo cu locual ta kere cu Aruba por cumpli cu n’e. Asina Prome Minister Evelyn Wever – Croes a duna di conoce.

Alabes Premier Wever – Croes a informa cu pa loke ta e landspakket y e deadline di 15 di december, a cumpli cu nan. Pa e deadline di 1 di januari a cumpli cu casi tur cos y loke cu no a logra ta cosnan cu ta den e proceso legislativo (leynan), pero nan ta encamina caba. Ademas a ricibi e prome mita di e financiamento pa e prome kwartaal di 2021 y lo ricibi e di dos mita unabes e presupuesto wordo verifica pa CAFT y ta na Parlamento.

Pa conclui, Prome Minister a expresa cu ta atendiendo cu tur e retonan y ta purba di atende nan na e miho manera posibel, a base di proyeccionnan mas realistico cu ta posibel.