E tarifa ta baha di 25% pa 15%
ORANJESTAD – E siman aki Minister Maduro a firma e decreto ministerial pa prolonga e tarifa reduci di impuesto riba pakete di retiro pa asina e facilidad aki keda vigente tambe den aña 2021. Tabata na aña 2019 cu Minister Maduro a opta pa baha e tarifa di inkomstenbelasting riba pakete di retiro pa asina por a acomoda, entre otro, e trahadornan di e refineria cu a haya pakete di retiro. Den aña 2020 a prolonga e facilidad aki y awor pa aña 2021 ta prolonga e facilidad fiscal aki un biaha mas pa por yuda esnan cu debi na e situacion economico cu COVID19 a hinca nos Pais aden, lo ricibi pakete di retiro. E decreto lo keda publica den e Gazetta Oficial (Landscourant) di Aruba di dia 18 di december 2020.
