Un departamento importante den e proceso di desaroyo economico
Manera por a tuma nota recientemente Prome Minister Evelyn Wever-Croes a tene algun bishita pa cera conoci cu empleadonan di e diferente departamentonan cu ta resorta bou di e Ministerio di Infrastructura. Desde siman pasa a reuni cu e Director di Kadaster despues di cu recientemente a tuma over e cartera di infrastructura. Diahuebs 3 di december 2020, a bishita Kadaster / DLV pa saluda e empleadonan.
E departamento aki tin un rol hopi importante pero e no a haya suficiente atencion den e ultimo temponan aki. Pues, e reunion cu empleadonan tabata necesario y a bay den bon ambiente, unda cu a haya e oportunidad pa scucha di nan mes kico ta nan opinion tocante e departamento y tambe con por hiba e departamento dilanti.
“Aruba ta atravesando tempo dificil cu Covid y e unico forma pa bay padilanti ta desaroyando nos economia. Den esaki Kadaster ta hunga un rol hopi importante. Pa motibo cu tur desaroyo di economia ta bay hunto cu desaroyo di comerciantenan cu tin necesidad pa tereno. Consecuentemente tereno mester wordo midi pa despues e tereno por wordo otorga y den esaki Kadaster ta hunga un rol hopi importante. E ompromiso cu e departamento ta pa traha riba e fundeshi pa hiba e departamento na e siguiente nivel pa yuda nos desaroya nos Pais. E tabata un bon reunion y mi ta aprecia e frankesa y tur informacion cu a haya di tur esnan concerni”, Prome Minister a duna di conoce.
