Divita ta e ganador absoluto traha pa Lidia Maldonado
ORANJESTAD, ARUBA (24 di november, 2020) – Dia 23 di november 10 participante a logra pa bay e final di e IT Challenge. Dia 17 di november e comision di SEYO nacional a haci un evaluacion di e 17 piesanan entrega y a revela e 10 finalistanan pa e evento final dia 23 di november.
E panel di jurado tawata uno varia y cu un presidente di jurado sin voto.
Esunan cu a forma parti di e jurado ta Alice van Romondt, Jodi Tobman, Frank Croes, Diantha Boekhouwer, Talitha Schouten y VickyArens Presidente di jurado sin derecho di voto.
Sin duda algun nan tawata tin un tarea dificil pero a logra na saca e 3 ganadornan. Nan a pone enfasis riba e siguiente punto nan. E piesa mester ta uno original cu no a ricibi un SEYO di artesania ainda, inpira door di nos naturalesa, storia, historia y cultura. Tambe e participantenan mester a entrega un storia di nan inspiracion y e concepto. E por ta traha cu toolsnan simpel of cu machinenan cu ta opera na man. Mester tin un acabado bunita y mester a usa e material adecuado y domina e material. Un punto hopi importante tambe ta cu e mester tin un balor comercial y mester por wordo replica pa por traha un coleccion. Y como e delaster punto e mester tin e factor WOW.
E anochi aki a pasavideo di e participantenan, tambe a splika mas di e piesa y e juradonan tawata tin e oportunidad pa por haci nan preguntanan. E di dos finalista keda den persona di Michella van Loon cu su piesa Oruma, e prome finalista tawata Freddy Ramirez cu su piesa Birds eye View y e ganador absoluto a keda den persona di Lidia Maldonado miho conoci como Lia cu su piesa jama Divita.
E anochi tawata uno diferente y culminante cu MC Joanne Dirksz directora di Cosecha y Leonardo Phillips cu no ta desconoci den e mundo di arte. Un sala completamente jen mantenendo nan mes na e protocol di Covid-19 di Cas di Cultura y cu hasta bo ta wordo asigna na bo asiento. Door cu tawata tin menos lugar pa sinta tambe a opta pa pasa e anochi aki live riba e Facebook page di Cosecha. Por bishita e paginanan di social media pa admira e piesanan y tambe por wak e videonan di e particpantenan.
