Diadomingo madruga a drenta informe di un accidente banda di e rotonde Santa Cruz, mesora a dirigi un patruya a bin compronde cu un Chevrolet AVEO cu tabata riba caminda di Santa Cruz bayendo pariba, a perde control net un tiki promer cu e rotonde di Santa Cruz y a dal contra un palo di luz. E impacto tabata asina fuerte cu e wayanan di corriente a cuminsa spat candela feroz te cu tabata tin hende a kere cu ta vuurwerk nan tabata tira. Polis a wordo avisa mesora door di algun hende cu a core jega wak. Mirando con e stuur den e auto a keda tur dobla, Central di Polis a wordo jama un biaha mas pa asina avisa nan cu kisas e chofer femenino por tin sla paden. Polis cu a jega den un rato di ora a pone e chofer supla, pero e chofer no a logra di supla segun reqeuri. Aki e dama a wordo deteni di biaha. Sinembargo Polis a laga personal di Ambulance controla e chofer femenino promer cu e a wordo hinka den auto di Polis. Despues di e checkup, Polis a hinka e chofer den auto y a bai cu ne. Personal di Elmar a wordo jama, ja cu e waya a cai y algun cas a keda sin corriente.
