Diasabra merdia a drenta informe di un accidente hit and run banda di Fa Yang na Santa Cruz y un chauffeur ta coriendo tras di e auto cu a ocasiona e accidente y ta rumbo pa Macuarima, mesora a dirigi un patruya na e area. Despues a drenta informe di cu e chauffeur cu a hit and run a para na un cas na Macuarima y a chauffeur a core bay paden. Un rato despues e patruya a yega na e sitio y a confisca e vehiculo y a detene e chauffeur cu a comete e hit and run. Afortunadamente ningun hende a resulta herida.
E accidente mes a tuma luga na e T-kruising Santa Cruz banda di e warda polis bieu, e caminda cu ta bay pa e supermercado Fa Yang. Segun informe compila na e sitio, e chauffeur di edad un tiki avansa tabata core den su auto blanco modelo Daewoo riba e caminda di Santa Cruz bayendo direccion Piedra Plat. Yegando e t-kruising, di repente un Kia lichtblauw modelo Serato a sali for di e caminda di Fayang y a bira su dilanti di golpi. Aki e chauffeur di e Kia a dal kita full e bumper di e auto Daewoo y a djis sigui core bay direccion zuid.
Un señora cu tabata testigo di e incidente, a dicidi di sigui e auto mientras cu Polis a wordo poni na altura. Finalmente e chauffeur cu a hit and run, a yega y staciona su auto KIA Serato den cura di cas na Macuarima 113-B. Aki patruya di Polis a yega y haci nan investigacion. Nan a detene chauffeur di e KIA. Datos di e testigo tambe a wordo tuma. E auto na Macuarima a wordo confisca y getakel.
