Oranjestad – Recientemente Minister Xiomara Maduro a ricibi bishita di Richard Dabian autor di e buki ‘Tekki e toteki’ cu a presenta na e mandatario un ehemplar di e buki.
Richard Dabian ta un contado di storia y cu e buki aki Sr. Dabian kier stimula e muchanan pa lesa. ‘Tekki e toteki’ ta un buki nobo di Richard Dabian pa e muchanan di Aruba, Corsou y Boneiro. Esaki ta di 3 biaha cu instancianan di Aruba y Boneiro ta uni forsa pa motiva muchanan na un manera placentero pa lesa. E ortografia no ta un obstaculo pa e muchanan di nos islanan ruman cu kier lesa e buki, ya cu e buki ta wordo publica na Papiamento y Papiamentu.
‘Tekki e toteki’ ta un storia di Tekki cu tin un soño y no ta laga nada strob’e pa e por logra su soño, aunke e ta hay’e cu hopi reto. E mensahe principal di ‘Tekki e toteki’ ta, cu no ta importa con bo ta mustra, semper kere den bo mes y si di curason bo kier logra bo soño bira realidad, lucha p’esaki. ‘Tekki e toteki’ ta corda nos como mayor y adulto pa stimula nos yiunan/muchanan pa asina nan por logra nan meta y haci nan soño bira realidad. Lesamento ta masha importante pa desaroyo di nos muchanan, pesey como mayor nos mester encurasha nos hobennan pa lesa.
Minister Xiomara Maduro ta gradici Sr. Dabian cu e bunita buki educativo aki y ta gradici tambe sra. Denise de Jongh-Rekwest di Request Publishing pa e publicacion di e buki y Divi Impact Foundation pa e bunita gesto di regala un pakete di buki na tur scol basico di Aruba.
