Grupo Melodia no ta un grupo cu mester introduccion mas y cu ya ta conoci pa hopi cu su musica unico den e diferente temporadanan di aña
cu nan presentacionnan y produccionnan tur aña.
Awor den e fin di aña aki, apesar di un tempo asina dificil a logra pa pone un disco compacto riba mercado pa asina por deleita e pueblo
cu e dushi musica pa fin di aña.
Despues di un combersacion cu e leader di grupo Melodia sr Rubin Ponson, a informa nos cu pa motibo di e situacion dificil cu nos ta pasando
aden, mester cumpli cu tur reglanan stipula y asina no por prepara pa presentacionnan pa e fin di aña aki. Esaki mes ta e motibo cu a
cuminsa for di trempan cu e preparacionnan pa un disco compacto cu 11 cancion, pa asina por mantene e tradicion y alegria den cada hogar
riba nos isla y tambe Boneiro y Corsou.
Melodia semper ta purba trese un repertorio hopi varia cu cancionnan popular clasico y tambe composicionnan nobo cu por toka durante
henter e temporada di Pasco y tambe di aña nobo cu bunita mensahenan dedica na e temporada.
Den e produccion aki por tuma nota di e variacion di ritmo manera tumba, wals, danza, gaita, merengue, calypso y tambe den e diferente
voznan cantando cancionnan di diferente compositornan cu cancionnan alegre.
Den e tenporada di grabacion Melodia tambe a pasa den e reto pa mantene e reglanan di e normal nobo, asina cu no a bai muchu facil pa e
grabacion, pero sigur a conta cu ayudo di otro musiconan manera Hubert Thiel, Michael Odor y Jair Boekhoudt den algun cancion.
Melodia ta gradici di curason e ayudo aki y mescos cu tur integrante cu ta para hunto tras di projectonan asina y tur cu e mesun meta pa
deleita nos dushi hendenan riba nos isla.
Den nomber di tur integrante: Rubin Ponson, Ivan Croes, Dido de Cuba, Silvienne Lampe, Jeremy Dijkhoff, Tim Fowler, Xyqion Arends, Dairon Kelly,
Cassandra Trimon, Junior Maduro, Kiziah Trimon, Danique y Dyantha Erasmus, Gilma y Nicole Dijkhoff, Gianimaris Croes, nos ta desea e pueblo
di Aruba y tur otro cu ta scucha nos, un bon temporada di fin di aña y cu nos por tin un prospero aña nobo.
