Oranjestad – Minister Maduro di Finansa a tuma nota di e declaracion di Minister Tromp di Infrastructura relaciona cu e 6.5 miyon florin cu Parlamento di Aruba a aproba pa wordo destina pa yuda Serlimar den su situacion financiero precario. Pa no tin duda riba e motibo pakico e fondonan aki no a yega Serlimar ainda, Minister Maduro ta brinda e siguiente aclaracion.

Na maart 2020 Parlamento di Aruba a acorda pa Minister di Infrastructura por saca 6.5 miyon florin di e presupuesto di su ministerio pa duna na Serlimar. E Minister no a percura pa saca e placa aki fo’i su ministerio, cu consecuencia cu e 6.5 miyon florin aki te ainda na october no a yega na Serlimar. Awor den Cambio di Presupuesto tin cu bay busca e placa aki den otro ministerio pa asina por yega na e 6.5 miyon florin pa por yuda Serlimar. 

Como Minister di Finansa nos a splica Minister Tromp y Conseho di Minister na varios ocasion cual ta e caminda cu mester cana pa e fondonan extra aki por yega na Serlimar. P’esey ta di lamenta, cu sabiendo esaki toch Minister Tromp ta opta pa no brinda e splicacion aki den reunion publico of den prensa ora di papia riba e situacion financiero precario di Serlimar.

Minister Xiomara Maduro ta enfatisa cu como mandatario encarga cu finansa, ta percura pa haci un trabou cu tur seriedad y p’esey ta duna e informacion corecto pa asina no laga espacio habri pa weganan politico cu no ta na bienestar di nos Pais.