Oranjestad – E Maneho Economico Fuerte y Resiliente 2019-2022 pa Aruba, tin 6 sector identifica cu potencial pa diversifica economia di nos Pais. Nan ta turismo, economia di conocemento, logistica, agricultura, economia circular y industria creativo. Departamento di Asuntonan Economico, Comercio y Industria (DEZHI) a organisa diferente curso via internet (webinar) pa asina por stimula actividad specialmente den e sector di Agricultura, Economia Circular, Industria Creativo y Economia di Conocemento.
Agricultura y Economia Circular
DEZHI atraves di su unidad ‘Iniciativa pa Desaroyo pa Empresa Arubano’ (IDEA) a organisa dos webinar pa brinda tips con pa anda den e pandemia y prepara negoshinan pa e normal nobo. IDEA a organisa tambe pa e sector di Agricultura webinars cu informacion basico riba plantacion, informacion riba e impuesto liber cu tin pa importacion di producto pa agricultura, informacion riba exoneracion di impuesto cu e agricultor ta conta cune y informacion riba tereno pa por planta. Banda di esaki IDEA a organisa un webinar pa yuda e agricultornan cu informacion con pa traha un ‘businessplan’ pa nan negoshi por ta exitoso. Riba e tereno di Economia Circular, IDEA a organisa webinar cu informacion riba e prohibicion di uso di ‘single-use plastic’ cu a drenta na vigor y a brinda informacion con nos por adapta na un economia circular na Aruba.
Industria Creativo
DEZHI atrabes di e unidad di Exprodesk ta asisti y guia companianan local pa exporta nan producto y servicio. Exprodesk a concentra e aña aki pa sigui desaroya e sector prometedor cu ta Industria Creativo. E unidad a crea proyectonan cu atraves di varios webinar, mastermind meetings y one-to-one coaching ta prepara e participantenan pa traha nan ‘Export Action Plan’ pa exporta nan producto of servicio. Asina a organisa ‘Music Market Ready 2020’ pa yuda y guia nos musiconan, ‘Tech & Services Without Borders 2020’ pa yuda nos profesionalnan technico den e sector creativo, y ta organisa ‘Arts Without Borders 2020’ pa empodera nos artistanan local cu conocemento pa exporta nan obra y talento pa exterior.
Economia di Conocemento
E mandatario ta sigui informa cu den cuadro di e sector di prometedor di Economia di Conocemento, DEZHI ta coordina den cooperacion cu United Nations Development Program y Katholieke Universiteit Leuven na Belgica, e Proyecto di ‘Sustainable Island Solutions through Sciences, Technology, Engineering and Mathematics’ (SISSTEM). Esaki ta e proyecto di e facultad nobo na Universidad di Aruba cu a inicia na september 2019 y cu ta brinda educacion riba nivel di bachelor y master den ramo di Sciencia, Technologia, Matematica y Sostenibilidad. E proyecto ta encera tambe e renobacion di e edificio Maria Convent. Den e edificio aki lo establece un Centro Caribense di STEM y un Centro pa por haci investigacion riba Sostenibilidad. E conocemento adkiri riba sostenibilidad lo por wordo exporta. E proyecto ta costa aproximadamente 25 miyon florin y ta wordo financia pa Union Europeo. SISSTEM ta contribui na Economia di Conocemento como un di e sectornan prometedor pa diversifica economia di Aruba.
Contribucion positivo na economia di Aruba
Minister Xiomara Maduro ta enfatisa cu economia di nos pais mester di impulso. DEZHI lo sigui ehecuta e Maneho Economico 2019-2022 y desaroya actividadnan pa guia y sostene negoshinan specialmente den e sectornan prometedor. E mandatario ta subraya cu esaki ta necesario pa crea diversificacion den economia di Aruba, stimula inovacion y pa contribui positivamente na e desaroyo di economia di Aruba.
