Tekki, e toteki: papiamento ta topa papiamentu
‘Tekki, e toteki’ ta e buki nobo di Richard Dabian pa e muchanan di Aruba y tur mucha di islanan ruman Corsou y Boneiro. Tekki tin un soño y e ta laga niun hende strob’e. E otro bestianan den mondi ta haya cu Tekki tin idea, pasobra Tekki kier su mes programa na television. Anto un programa tocante historia. Tekki kier mustra tur bestia cu e por logra su meta. Tekki tin hopi reto su dilanti. Su soño ta bira realidad?
Autor Richard Dabian ta invita tur mucha lesa su buki nobo anto pa nan haya sa con ta bayendo cu Tekki.
Richard Dabian a haya e inspiracion pa e storia aña pasa pa encuresha mucha cu ta busca un carera artistico. Esaki ta un publicacion di Request publishing. Adaptacion di e texto ta di Marlon van der Linde, Ilustracion di Gairo Tromp, diseño grafico Timothy Lampe y e buki a keda edita pa Denise de Jongh-Rekwest. ISBN 978 99904 5 234 1.
Dos aña pasa Richard a contribui na Festival di Buki pa Mucha pa e buki ‘Amigonan tur caminda’ cu e storia titula ‘Unda mi ronchi preto ta?’. E buki aki ta un compilacion di storia pa mucha. E aña despues Richard a presenta e storia ‘E faro di mulitcolo’. Y awor e escritor tin un otro buki pa mucha titula ‘Tekki, e toteki’. Richard Dabian ta coordina actividad di atardi pa mucha na biblioteca. Durante e Festival di Buki pa Mucha 2020, cu ta tuma lugar dianan 2 pa 6 di november, e ta conta e storia di Tekki pa medio di un presentacion online cu ta pasa riba e canal di YouTube di Biblioteca Nacional Aruba. Por wak esaki tambe via biblioteca su website.
E buki ta disponibel despues di dia 28 di oktober na librarianan local. Entrante november por fia e buki na biblioteca.
