E pilar number 7 pa sigura integridad ta e ley cu ta financia e partidonan politico. Prome Minister Evelyn Wever-Croes a felicita Parlamento cu recientemente a pasa e ley aki. Esaki, Prome Minister ta enfatisa cu ta un di e leynan principal den combati corupcion. Na momento cu un persona drenta den gobierno, e portanan ta habri pa e politico pone su integridad na riesgo ya cu sponsornan grandi, local y internacional ta bay purba na cumpra e integridad di e politico.

Esaki ta un situacion cu ta pasa hopi durante campaña politico na unda cu comerciantenan ta acerca e politico pa inverti den su campaña. Prome Minister ta conseha tur politico cu na momento cu un comerciante yega y ofrece pa sponsor nan campaña, pa nan core leu ya cu esaki nunca tin bon intencion su tras. Ta sumamente importante pa ta hopi cauteloso kico un politico ta priminti durante campaña. Na momento cu un politico priminti di legalisa algo of cambia ley riba algo otro y e comerciante a inverti den su campaña, conta cu nan ta bin cobra e fabor ey despues poniendo hopi presion.

“Como Gobierno bo mester ta hopi cauteloso na momento di tuma decisionnan asina, y percura pa semper cana e caminda legal y corecto. Sin importa kico esun cu a financia bo campaña ta exigi di bo of pone presion riba bo pa haci. Esaki ta e unico manera pa logra integridad den gobernacion. Na Aruba esaki ta pasa hopi pasobra tin hendenan cu ta kere cu pasobra nan a cumpra integridad di un of mas parlamentario, of un minister, nan tin derecho di cumpra henter un gobierno. E lucha aki ta real, y e ta duro, pero ora bo tin e berdad y integridad na bo banda, bo no mester teme nada”, Prome Minister a duna di conoce.

Cu e ley aki, Parlamento a cuminsa pone un fin na e presion ey. Ex Prome Minister Sr Mike Eman a haña un donacion di $50 mil dollar di Roberto Rincon pa financia su campaña. Esaki ta casi sigur un di e hopi otro donacionnan cu tawata tin na partido AVP ya cu esaki lo ta practica normal den partido AVP, pasobra ningun integrante di e partido a sali desmenti esey.

Esaki sigur, Prome Minister a indica, lo ta un practica cu no ta bay ta posibel mas. Pa ley niun politico no por acepta donacion y mucho menos sumannan exorbitante asina.

“E donacion aki a wordo duna y depsues nos refineria, nos pilar economico a bay den man di Citgo cu ta e trabou cu Roberto Rincon a intermedia pa gobierno anterior teniendo e pilar economico rehen pa asina tanto aña. Esaki ta un ehempel bibo di con financiamento politico tin su resultado perhudicando full un pais na unda miles di trahado no por a haña un trabou.

Pa nos partido MEP en todo caso e cos aki no ta nada normal, y no ta acceptable.

Pero awor cu e ley cu Parlamento a pasa, e cosnan aki no por pasa mas. Pabien un biaha mas y DANKI pa a sostene e ley aki”, Prome Minister Evelyn Wever-Croes a enfatisa.