ORANJESTAD – Dia 1 di October ultimo a cumpli 30 aña der servicio di gobierno di Aruba Sra. Esther Goedgedrag. Pa recorda e ocasion special aki Sra. Luenne Pieters directora di Departamento di Impuesto den nomber di Minister di Finansa, Asuntonan Economico y Cultura Sra. Xiomara Maduro a entrega na sra. Esther Goedgedrag e acustumbrado envelop, como tambe un regalo. Sra. Pieters a gradici Sra. Goedgedrag pa su añanan di servicio na nomber di gobierno di Aruba.
Sra. Goedgedrag a cuminsa cu su carera profesional na aña 1989 na momento cu ela solicita na Departamento di Impuesto pa por forma parti di e enseñansa Controleur der Belastingen cu a wordo organisa e tempo ey. Sra. Goedgedrag tabata empleado na Banco Central di Aruba den e seccion di “Research”. E Minister encarga cu Departamento di Impuesto e tempo ey, Sr. Trinidad den felis memoria a duna su aprobacion pa Sra. Goedgedrag por sigui e ‘opleiding’ aki y pa e periodo di aki ela wordo poni na disposicion di Departamento di Impuesto. Despues di a logra e diploma di Controleur der Belastingen Sra. Goedgedrag a wordo nombra na Inspectie der Belastingen. Durante su carera profesional na Departamento di Impuesto Sra. Goedgedrag a crece den su funcion di Controleur der Belastingen, Hoofdcontroleur der Belastingen, Hoofdcontroleur der Belastingen 1ste Klasse, Referendaris y actualmente ta forma parti di ‘Team Ondernemingen 2’. Mester menciona cu Sra. Goedgedrag a ricibi varios gratificacion pa su extra esfuerso pa diferente proyecto cu ela realisa pa e departamento ‘Team Ondernemingen 2’. Minister Xiomara Maduro ta yama sra. Goedgedrag masha pabien y ta gradici’e pa su contribucion como empleado publico ehemplar di nos pais Aruba.
