Den un interview cu a pasa dialuna ultimo di 28 di oktober den Telenoticia na TELEPOR, nos por a ripara cu e mucha manda di Otmar Oduber un biaha mas ta purba na manipula cu informacion y uzando palabranan cu ta keda grandi pe, manera ORGUYO y compania NACIONAL. Nos por mira con e spindoctornan, mescos cu tempo di Mike Eman, awor ta trahando duro cu p.e. compilacion di video cu ta bay riba medionan social, mandando hende pa papia tur caminda, manera e director di Serlimar y tambe lider di fraccion di POR cu ta trata na bende e importancia di ley, pero cada uno contradiciendo otro.

Meneer Davelaar den su entrevista ta menciona un sin fin di tareanan di Serlimar, cu por cierto por keda wordo haci SIN e cambio di ley! Trabounan cu ta pone cu Serlimar por keda opera como compania y keda competitivo cu otro companianan riba e mercado. 

Pero Meneer Davelaar parce di ta pura pa pasa e cambio di ley di Serlimar, pa asina purba na sconde e maneho desastroso di su amo Otmar Oduber y tambe di su mesun persona. Hunto cu esaki lo kier tapa e tantisimo corupcionnan cu a sosode y ta sosodiendo keto bay den Serlimar! Meneer Davelaar parce di tin miedo pa pueblo haya sa con deficiente e maneho en general ta na Serlimar, vooral ora cu el ta tuma over, na unda cu e maneho AD HOC di meneer Davelaar, esaki riba instruccion di su amo, a hinca Serlimar den un problema financiero grandi?

Ta pesey e ta roga den un forma ansha, pasobra cu nan budget ta hopi mas cu loke nan ta haya di gobierno, pa Parlamento pasa e ley aki pa nan por hala rosea trankil? Rosea trankil pa por cumpli cu tur e debenan cu nan a hinca e compania aden? Rosea trankil pa e actonan cu no por wak luz di dia wordo tapa?

TA PA E MOTIBO AKI NI MENEER DAVELAAR, NI MINISTER ODUBER NO KIER PRESENTA E CUENTANAN ANUAL, CU TA CLA DEN CONCEPTO!

Ora nos wak e ansha di morto aki pa ley aki pasa, ta pone nos di UPP haya confirmacion cu ni e director di Serlimar ni e minister encuestion kier pa pueblo haya sa con nan dos a compromete Aruba, sin cu nan tabata tin un presupuesto pa esaki. Nos ta spera cu nos Parlamentarionan critico, otro, integro y diferente por haci mas pregunta riba e aspecto aki. 

UPP ta considera cu den ley, cu TUR e cambionan proponi te awor, ainda tin veneno di e Scorpion aden. Si Parlamento pasa e ley aki, nan ta yuda na laba cabez di tanto e director como e minister, pa firma pa algo pa nan no ta autorisa pe y sin destaho segun ley, manera den e caso di e contracto miyonario di huur y e contracto sin ningun tipo di destaho di Sero Teishi y pa colmo sin cu tin un presupuesto pe!!

Banda cu na prome instante articulo 1c tabata mustra di ta e veneno principal, esta e asunto di INCINERATOR  (grandi), y cu sin mucho sapatiamento minister a bisa di no tin problema pa lague afo, UPP ta kere cu articulo 1b di carambola tambe a wordo hinca den ley. Aki ta crea un “GELEGENHEIDSWETGEVING”  mescos cu e Parlamento di AVP a haci den e caso di Paul Croes, y den pasado cu Benny Sevinger ora cu ta bin cu na final di aña ta cambia full un begroting pa acomoda gastonan haci sin permiso di Parlamento.

Meneer Davelaar y minister Oduber TIN PURA PA E LEY PASA PA ASINA EY E DJO-DJO-MENTONAN AKI DEN SERLIMAR SIGUI. Y pa colmo for di propio palabranan di meneer Davelaar nos por saca afo cu keto bay e  “SPROOKJE” di “W2E via mass incineration” ta den wega!! 

Pueblo; TA BASTA CU MANIPULACION! TA BASTA CU CORUPCION.

31 oktober 2019

Booshi Wever

Lider UPP

Brazil 163

•