Ta increibel con weganan politico ta wordo hunga cu pan di nos trahadornan Arubano na aeropuerto. Algun siman pasa minister Dangui Oduber a declara un NO enfatico na retiro di trahadornan di aeropuerto. Miembronan di Parlamento, incluso presidente di Parlamento, a bay aeropuerto pa papia cu Triple A. Supuestamente gerencia di Triple A lo a garantisa, alomenos por lo pronto, cu lo no tuma ningun decision di retiro y lo evalua esaki di nobo durante e proceso di reorganisacion. UPP a wordo aserca sinembargo door di diferente trahador di Triple A cu a señala cu e gerencia stranhero di e compania ta sigui cu nan intencion pa retira hende for di trabou cueste loke cueste.
Pa UPP ta inacceptabel cu hustamente na e momentonan aki, memey di un pandemia, e compania ta sigui cu su intento pa retira trahadornan. Aparentemente ta e intencion pa usa e situacion actual causa pa COVID-19 como motibo pa retiro, si no por boluntario anto elo bira obligatorio.
UPP ta haci un yamada na tanto minister Oduber y tambe na Presidente di Parlamento pa atende e caso aki cu suma urgencia y yama e minister aden pa dun’e instruccion pa trece claridad den e intencion di e gerencia. Con por kita hende awor mientras ainda no a presenta un plan di reorganisacion? E trahadornan ta biba diariamente cu stress y no por haci nan trabou eficiente. Nan no tin confiansa mas den e CEO ni e HR-manager. Gran parti di e 27 empleado cu a bay boluntariamente lo a wordu menasa di no tin trabou mas den e reorganisacion. Triple A no a ofrece un pakete husto, vooral si tene na cuenta e añanan cu e empleadonan a traha cu alma y cuerpo pa yuda e empresa prestigioso aki eleva su nivel di calidad di servicio y bira un empresa hopi stabiel cu reserva financiero compara cu tur e otro companianan estatal.
Den pasado Triple A a sobrevivi e crisis causa pa 9/11 y Nathalee Holloway y Triple A a logra toch pa draai 3 aña sin ganashi y sin tin mester di kita ningun empleado e tempo ey.
Informacion ta mustra cu e CEO y HR-manager lo concretisa e plannan di retiro masal di empleadonan di Triple A. Aki ta papia di mas di 50 empleado Arubano cu lo tin di bay cas. E CEO y HR-manager no tin cuenta at all cu e situacion financiero di e mama y tata di famia, peor ainda den e tempo aki di crisis, pero ta wak simplemente e situacion financiero di e compania y pa na mes. Desde 2003 ta existi un partnership cu Schiphol y aunke gobierno ta 100% doño, toch parce cu e “baas” ta Schiphol cu ta haci y deshaci. Prueba di esaki ta con nos parlamentarionan ta cay na rudia pa e CEO, pasobra enbes di solicita nan presencia na parlamento pa duna cuenta den detayes di nan plannan, ta e parlamentarionan mester a bay aeropuerto. UPP a compronde cu e situacion financiero di Triple A mes lo no ta malo, manera ta purba aparenta. Mira con e turista ta sigi bin Aruba. Tin hopi miyonario akinan na Aruba cu tin nan “second home away from home”, hopi tin time shares, condos, business, friendship, families, long term visitors pasobra Aruba ta un isla hopi sigur, safe y hopi humilde.
E siman aki lo por bira uno hopi scur pa diferente hogarnan aki na Aruba, si gobierno ni Parlamento no actua. Kico ta e medidanan cu e compania mes a tuma, e.o. pa e salarionan barbaro di e.o. e CEO, HR-managernan y demas managernan cu si a keda cu tur sorto di toelage, core den autonan luhoso di compania?? Kico a para di e supuesto Wever-Croes norm? Esaki lo conta pa e dos stranheronan aki? Di cual uno ta Hulandes Europeo y e otro di e isla Corsou? Nos mes no tin hende apto pa carga e funcionnan y cu salarionan menos stravagante? Kizas ta intencion pa despues bolbe bisa cu mester hende y sigui trece hende di afo, manera nan a bin ta haci na Boneiro? Anto ainda nos no ta bou di e capa di hervormingsentiteit mes, na unda cu e Hulandesnan kier pa nos agilisa entrada di esnan di afo pa bin traha na Aruba. Nan a cuminsa prepara e cama pa nan mesun hendenan?
Nos apenas awor a cuminsa haya informacion y den e dianan nos dilanti lo sigui cuestiona henter e asunto aki. Keda pendiente. Pero nos kier a manda un mensahe cla y raspa, tanto pa gobierno cu ta pretende di ta poniendo e hende central y e parlamento balente y brabo pa no laga e dos stranheronan sigi masacra nos trahadornan Arubiano na aeropuerto, hibando nan na e altar di sacrificio!
Partido UPP
Booshi Wever
4 oktober 2020
