“Mi fe ta grandi y mi confiansa den autoridad tambe y mi ta sigur cu nos lo pasa esaki tambe y nos por bay bek na normalidad”

Diahuebs Prome Minister Evelyn Wever-Croes a wordo notifica door di autoridad cu tin un menasa na su persona. Autoridadnan ta tuma e menasa sumamente na serio y a recomenda Prome Minister pa aumenta vigilancia y siguridad. Prome Minister a duna di conoce cu e no ta un persona cu ta gusta tanto siguridad pero den e caso aki a pone confiansa na autoridadnan competente y ta respeta tambe e instruccion haya di autoridad y por a nota cu e vigilancia a aumenta rond di supersona y di su famia pa no pone nan na niun clase di riesgo of peliger.

“Sinceramente ta algo cu mi ta lamenta. Mi tin 3 aña caba como Prome Minister haciendo e trabounan aki na e miho forma cu ta posibel, poniendo e ser humano central y tumando decisionnan sumamente dificil purbando semper di busca e balansa. Un menasa sigur no ta algo cu bo ta spera pero ta bin cu e funcion, e responsabilidad y e trabou. Pues vigilancia a wordo aumenta y wardando decision di autoridad pa ki ora lo descala esaki ora cu no ta necesario mas. 

Mi sa tin hopi instigacion den comunidad y redo y mi ta compronde cu tin hopi nerviosismo pero no ta motibo pa instiga y lanta odio contra otro hende. Con cu bay bin mi ta un persona di carni y weso mescos cu cualkier otro ciudadano di pais Aruba. Mi tin e derecho di tin mi privacidad y di move liber riba e isla aki. E insitigacionnan mi ta lamenta pero mi a wak e ta bin di cierto politiconan oponente y cierto medio di comunicacion cu di un forma hopi iresponsabel buscando sensacion ta kibra tur regla di etika. Pero ta cosnan cu nos tin cu biba cu nan. Mi fe ta grandi y mi confiansa den autoridad tambe y mi ta sigur cu nos lo pasa esaki tambe y nos por bay bek na normalidad”, Prome Minister a duna di conoce. 

•