ORANJESTAD – September ta e luna cu ta dedica na monumentonan di nos Pais. Pa conserva nos monumentonan ta importante pa nan ricibi nan mantencion regularmente. Den e relato aki Minister Maduro di Cultura ta brinda informacion riba e trabounan di mantencion cu ta tuma lugar riba diferente monumento di nos Pais.
Den ultimo tres aña trabounan di mantencion a wordo haci na e edificionan di Ecury Complex den cual Museo Arkeologico di Aruba ta ubica. E trabounan a finalisa y asina e museo importante aki pa nos Pais por a habri pa publico atrobe den aña 2019. Trabounan di mantencion a wordo haci tambe na School 1888 cu ta e edificio den Wilhelminstraat unda cu Controlaria General di Aruba (Algemene Rekenkamer Aruba) ta ubica. Na Stadshuis tambe a tuma lugar trabounan di mantencion y poco dia pasa a instala un ‘traplift’ tambe pa haci e edificio importante aki den cual Censo ta ubica, mas accesibel pa comunidad. Watertoren Oranjestad, Nicolaas Store na San Nicolaas y e grafnan di Commandeur na Hato tambe a ricibi nan mantencion. Na edificio di Corte tambe trabounan di mantencion ta tumando lugar. Actualmente tin tres proyecto di mantencion den forma acelera tumando lugar den e trayecto di ‘Fast Track’ pa stimula nos economia. Ta trata di trabounan di mantencion na Henriquez Pand den Schelpstraat den cual oficina di Monumentenfonds ta ubica, na Weststraat 15 unda ex museo numesmatico tabata situa y tambe na California Lighthouse, cu ta haya un mantencion principalmente na e parti paden.
Minister Xiomara Maduro ta enfatisa cu un monumento ta conta historia di nos Pais y pesey ta nos deber pa cuida y conserva nan como parti di nos herencia cultural. Mantencion di monumento ta keda un trabou necesario y esencial.
