Diahuebs 24 di september 2020 Minister di Desaroyo Teritorial, Infrastructura y Medio Ambiente, Marisol Lopez – Tromp a firma otorgacion di un tereno comercial pa e compania Cunucu Fresh. Sr. Leo Werleman y Jake Arends di Cunucu Fresh tambe a firma e documentonan y pronto nan lo por sigui expande nan produccion na Alto Vista.
Sr. Arends a splica cu Cunucu Fresh ta haci uzo di sistema hidroponico (hydroponic) cual ta significa cu e awa ta circula. E lechuganan ta absorbe e awa cu nutrientenan cu nan mester y e resto ta bay bek den un tanki pa despues e circula bek. E sistema aki ta haci cu por crece berdura fresco henter aña.
Expansion
Den transcurso di añanan Cunucu Fresh a keda expande. Aworaki nan tin dos ‘greenhouse’ y tin un tercer cu ta den construccion riba e tereno cu tin actualmente. A base di e demanda grandi pa produccion local, ta bin cu e necesidad pa keda expande. Pa cual ta contento cu esaki ta posibel awo cu e tereno na Alto Vista.
Na e momentonan aki e productonan di Cunucu Fresh ta obtenibel na diferente supermercado y restaurant rond Aruba. Algun caracteristica di e productonan local manera entre otro e lechuganan cu Cunucu Fresh ta crece ta, cu nan ta smaak mas dushi, nan ta fresco y ta dura mas largo na cas den frishidair.
Finalisando sr. Arends a bisa cu e ta haya e direccion cu Gobierno ta bayendo aden pa promove produccion di fruta y berdura local hopi bon. Pasobra na Aruba ta custuma pa importa tur cos y awo cu mas y mas persona ta produci localmente ta muestra cu na Aruba mes nos por. E productonan tin mas sabor, cual ta haci cu hende ta come mas berdura y bira mas saludabel.
