Aruba tin hopi potencial pa desaroya e sector agricultural
24 di september 2020 ta keda marca como un dia historico na Aruba, pasobra nunca prome Aruba a conoce un desaroyo manera cu ta tumando luga den e industria di agricultura. Director di 297-Farm sra. Patricia Mitton a firma cu Minister Marisol Lopez – Tromp e otorgacion di tereno di huur comercial na Savaneta. Cu e paso aki Gobierno ta lantando un pilar economico nobo.
Sr. Fung A Fat a splica cu e ta contento di mira e gran interes tanto di Gobierno y di comunidad den e sector agricultural. 297-Farm tin algun aña den e industria y por a tuma nota cu anteriormente no tabatin mucho interes, pero desde Covid hopi cambio a tuma luga y e interes a crece hopi cual ta positivo.
Mas hende ta planta y pues aworaki localnan tin mas opcion pa cumpra berdura produci na Aruba mes y cu ta di bon calidad y pesey mester sostene otro.
Seguridad di cuminda (Food Security) ta un topico popular mundialmente y sigur ta toca Aruba tambe. E tema aki ta encera accesibilidad di cuminda nutritivo na un bon prijs. Pues ta importante pa nos muchanan wordo educa riba kico ta bon pa come y tambe con pa produci y cosecha esaki nan mes (no lesa den buki solamente).
Concluyendo sr. Fung A Fat a enfatisa cu tur esaki ta posible si na Aruba nos sostene otro y kere den e calidad di productonan cu ta crece na Aruba mes. Aruba tin hopi potencial pa desaroya e sector agricultural, sigur cu sosten di Gobierno den 5 pa 10 aña lo por tin mihor garantia di compania na Aruba.
