E discurso di Rey Willem Alexander na ocasion di apertura di aña parlamentario di Staten General a duna di un forma elocuente y conmovedor un bista loke e crisis di corona a ocaciona y con e gobierno Hulandes, den union y cu hechonan, ta percura pa bringa e pandemia. E realidad ta otro. Si scucha y lesa e discurso un par di biaha, nos por saca afor hopi contradiccion- y contrariedadnan den loke gobierno Hulandes kier presenta.

Pa cuminsa loke ta trata Caribe Hulandes. A dedica algun palabra so y mas bien a referi na e condicionnan cu ta wordo imponi riba e paisnan den Caribe pa asina por haya e ayudo financiero. Den e discurso nos Rey ta reconoce cu e parti Caribense di Reino ta “zwaar getroffen” y ta papiando (“wordt gesproken”) riba e clase di ayudo y e condicionnan pa e ayudo aki. Pues atrobe ta papia di “papiando” y no “negociando”, loke cu nos Prome Minister si kier pone nos kere y cu Knops awor tambe ta manera admiti. Loke si e Rey ta bisa ta cu e ayudo huminatario ta keda disponibel. Lo ta referi na e “voedselpakketten” e.o., pero e declaracion ta zona manera uno di limosna y di acto di un “Bon Samaritano”.

Si sigui lesa e discurso, ta domina e sentimento cu aki ta papia cu un “gespleten tong”, esta na mes momento ta duna diferente opinion contradictorio loke por wordo interpreta como hipocresia, na unda ta bisa un cos y ta pensa otro. Dicon y pakico nos ta bisa esaki? Den e discurso e Rey, cu ta vocifera e opinion di gobierno Hulandes, ta mustra cu nos no por subestima e consecuencianan di e coronacrisis aki, den sentido economico y geo-politico. Aki e ta papia di e “eigenbelang” di paisnan cu por trece desekilibrio riba plano mundial. P’esey e gobierno Hulandes ta mira como esencial pa tin instancianan internacional cu ta funciona bon, manera Nacionnan Uni y cooperacion internacional pa asina resolve e problemanan cu ta surgi den e periodo aki.

E Rey ta conclui cu e gobierno Hulandes ta asumi su responsabilidad y ta considera como su obligacion moral, pero tambe na su propio interes (eigenbelang), pa sigui sostene regionan vulnerabel den mundo cu a wordo afecta door di corona. E Rey ta pretende cu corona ta siña nos, pa hunto nos ta para mas fuerte internacional den e crisis aki y apesar di e discusionnan cu a wordo hiba na Europa, cooperacion y union tabata necesario pa combati e inseguridad geo-politico creciente. Segun e Rey ta un forma di solidaridad unda cu manera bon bisiña nos mester por yuda otro den temponan dificil, pero na mes momento mira con nos por bin cu reforma den propio cas pa asina ta bon prepara pa un eventual otro crisis.

Hopi importante ta cu Rey Willem Alexander ta mustra cu e estado di derecho ta e bien publico mas importante di un comunidad, un nacion. E ta e fundeshi democratico di un pais social- y economicamente fuerte. E calidad di nos estado di derecho ta wordo menasa na momento cu e.o. tin trato desigual. P’esey nan ta kere cu diferencianan mester wordo surpasa door di cuminsa scucha otro. Segun e Rey gobierno Hulandes ta realisa con importante ta e confiansa cu mester tin den e actuacion di e gobierno mes. Gobierno mester ta para banda di e hende y no enfrente (contra) e hende. Pakico e ideal menciona door di e Rey no ta wordo efectua na Aruba? Un biaha mas e hechonan di e gobierno hulandes ta contradictorio na unda na un manera dictatorial kier mishi cu e derecho inalienabel di autodeterminacion di e PUEBLO ARUBANO!

Pa UPP ta mustra cu ta purba na duna di conoce cu gobierno Hulandes ta para banda di e pueblo, pero na mes momento den e discurso ta papia con mester percura pa e islanan Caribense bay di acuerdo cu e condicionnan di ayudo. Y sigur e conferencia di prensa di Knops di diahuebs 18 di september 2020 ta ilustra exactamente e contrariedad aki di e discurso di Rey Willem Alexander. Knops ta bolbe mustra cu tempo ta core pa Aruba mirando e situacion di corona-virus y cu di nan banda tin un “onverplicht voorstel”, cu mucho no por wordo cambia na dje. Simplemente Aruba mester bay di acuerdo cu e proposicionnan, e condicionnan y e palabracionnan.

Mientras cu Rey ta bisa cu gobierno mester surpasa e diferencianan, Knops ta haciendo net lo contrario. E kier BULLDOZE y no kier sucha nada y kier comete un “CONSENTUELE VERKRACHTING”!!

Aunke cu Knops kier bin pretende  atrobe cu lo no mishi cu nos autonomia y nos Estado di Derecho, cu segun gobierno Hulandes “ta e bien publico mas importante di un comunidad” nos ta di opinion cu papiando mes riba  e “consensusrijkswetten” Hulanda ta actuando linea recta di loke articulo 73 di e Carta Magna di Nacionnan Uni. Haciendo esaki, tanto gobierno Hulandes como esun Arubano, ta trapa riba nos derechonan menciona den e handvest aki.

E dos “rijkswetten” di Raft y OHHA/CHE  ta trapa riba nos derecho inalienabel di autodeterminacion. Pues NO por tin ni un REFERENDUM, manera Minister President ta sugeri, pa e simpel motibo cu su base ta bai contra e derechonan  humano poní den articulo 73 di e Carta Magna (Handvest) di Nacionnan Uni.

Si enberdad Hulanda kier yuda, haci esaki cumpliendo cu loke e mes ta bisa y respetando nos derechonan humano y Aruba na su turno mester bisa basta na e Mal Gobernacion.

Pues un postura  fuerte y determinante: “NO MAS MALGOBERNACION Y NO MAS NEO-COLONIALISMO”!!

#accionpaliberaaruba.

#ala.

Partido UPP

Booshi Wever

17 september 2020

•