ARUBA TA LOGRANDO UN FIANSA RIBA MERCADO INTERNACIONAL
Den un discurso nacional diahuebs anochi Premier Evelyn Wever-Croes a elabora riba e negosacionnan cu Hulanda. Den dos palabra: decepcion y oportunidad nobo. Premier Wever-Croes a splica cu momento cu e crisis a dal Aruba, Hulanda tabata dispuesto pa presta Aruba placa, pero a pone condicionnan hopi dificil. Aruba a acepta tur condicion, y a cumpli cu tur. Un di nan tabata cu mester corta 35 miyon florin den cuido medico, hustamente memey di e pandemia. Aruba asina mes a cumpli cu e condicion aki tambe, pa por a haya e fiansanan di Hulanda. Nan a parti e fiansa den tranche, y a paga tranche 1 y 2.
Tranche 3: 204 miyon pa juli, augustus y september
CAFT a duna conseho positivo pa Hulanda presta Aruba tranche 3 di 204 miyon florin pa 3 luna, juli, augustus y september. Esaki ta remarcable, pasobra pa CAFT duna Aruba un conseho positivo memey di e crisis, ta un logro hopi grandi. Pa sorpresa di Aruba, algun dia prome cu e deadline, Hulanda a presenta Aruba cu 218 pagina na condicionnan nobo, y dos rijkswet nobo. Aruba e ora a cuminsa negocia cu Hulanda. E negosacionnan pa e 3e tranche tabata dificil, semper cu respet mutuo, pero Hulanda no kier a cambia mucho.
Aruba a haya otro sorpresa fin di siman pasa, cu Hulanda a cambia e condicionnan atrobe, na ultimo momento. Premier Wever-Croes a referi na e hecho cu awor Hulanda ta cambia e 3e tranche di 204 miyon pa 3 luna, den 204 miyon pa 5 luna. Esaki ta crea un problema di likides nobo di 130 pa 140 miyon florin, net awor memey di e crisis di Covid.
Esey a pone cu Gobierno a wordo forsa pa bay busca financiamento, y por a constata cu tin interes riba Mercado financiero pa presta Aruba placa. E trabounan ta wordo formalisa awor, mientras cu ta keda cu Hulanda na mesa, y ta spera di convense Hulanda pa negocia na un forma mas husto. Esaki ta un bon noticia, pasobra e ta mustra bo cu e confiansa den Aruba riba mercado financiero, ta bolbiendo. Aruba SEMPER a paga su debenan, y na tempo, y e bon nomber ey a cuminsa yuda nos bek.
Reforma
Mes momento Aruba ta cuminsa ehecuta e plan di reforma, e masterplan “Reposicionando rumbo di nos pais”, cu a wordo traha pa 250 profesional local. Gobierno a apunta un stuurgroep di implementacion y nan lo cuminsa traha riba e 5 punto cu ta wordo considera e aceleradornan, cu ta: eliminacion di burocracia y red tape, revision di leynan laboral, reforma di nos sistema di impuesto pa uno mas husto, digitalisacion di procesonan den gobierno y ampliacion di nos capacidad di traha y cambia ley. Una bes cu atende cu e aceleradornan aki, e demas reformanan lo bay mucho mas lihe, y Aruba lo logra nos meta mas lihe. Y si Hulanda kier yuda nos den esaki, nan ta mas cu bon bini pa yuda nos, pero e ta NOS plan y NOS ta ehecut’e.
“Pasobra e pais aki ta di NOS, y ta NOS mester saca e pais padilanti. Tur esnan cu kier yuda nos, ta bon bini. Pero esnan cu kier kibra nos, mester keda leu. Pasobra nos tin un meta: ARUBA MESTER PROGRESA”, tabata palabranan di Premier Evelyn Wever-Croes.
