Ultimo simannan UPP a bin ta mustra con e gobierno POREDmep ayuda y sosteni pa Parlamento ta traicionando e pueblo Arubano. Lastimamente cu nos politiconan no a siña di erornan cometi den pasado.
Ta bisto cu e novela (tragi-comedia) ta den su enlace, unda Pueblo lo haya sa kendenan ta e quinta columna colaborando cu e abusador pa asina hinca Aruba bou gara Hulandes. Nos conoce na 2 ocacion un entidad colonial den pasado, esta West Indische Compagnie 1 y 2. Y pronto nos lo conoce e di 3 WIC, pero cu nomber mas moderno y bou capa di esun cu supuestamente lo bai salba nos, esta e OHH/CHE.
Remarcabel ta cu un biaha mas Knops ta declara, cu e “landenpakket” ta conoci na e.o. Aruba desde PROME cu e COVID-19. Y e PM di Aruba, sin un tiki berguenza y sin gevoel ta bisa cu esaki tabata un sorpresa pele. Te ki dia ta keda manipula nos pueblo?
Pero no ta pornada e PM, deliberadamente nos no ta bisa nos PM, mirando e actitud entreguista, ta kedando keto riba e detayenan, cu ya como gobierno nan a bay di acuerdo cu ne caba. Pesey e ta bisa cu e lo por biba cu 80% di e “landenpakket”! Y cu hasta e gobierno POREDmep a cuminza traha riba varios di nan caba.
Siman pasa Gradus, presidente di Caft, esun cu Knops ta sigui ciegamente y kende oro un OHH/CHE di e 3 macambanan, tambe lo sigui su consehonan, a bisa cu pa nos por tin un crecemento economico lo mester flexibiliza e proceso di otorgamento di permiso di trabou y estadia. Tambe e ta bisa cu mester trece 28.000 contribuyente den nos fondonan social. Dicon e PM di Aruba no ta bisa net net nada di esaki? E idea di e flexibilisacion aki ta hinca den e “landenpakket”. Y e idea di crecemento aki Gradus a bisa prome COVID-19 tambe.
Aparte di e 28.000 hendenan aki, gran mayoria cu sueldo minimo, tin derecho conforme un tratado cu Aruba ta mara na dje, pa trece nan famia. Esaki ta nifica cu mester multiplica e 28000 aki cu por lo menos 3 mas. Pues un crecemento cu 114.000 hende mas riba nos isla. Pues nos poblacion lo bira 249.000 hende! Di e 114.000 aki 56.000 lo ta mucha cu lo mester bai scol. Pues mas presion riba nos espacio, infrastructura y finanzas.
Anto nos no ta ni papia mes riba e flexibilizacion di nos leynan laboral y den e caso aki specificamente e ley di retiro y cu lo bai mishi cu nos AZV y nos edad di pension.
Kico e sindicatonan cu a brasa e traicion aki kier? Bay na e situacion di tempo di “HIRE & FIRE”? Of contractonan di corto duracion, unda doñonan di empresa ta bolbe bay abusa, manera ya caba ta e caso den e crisis aki!! Ta pesey e gremionan comercial ta pura pa firma. Nan ta lubida cu nan ta esnan cu mas a probecha di mannan LOS di e politiconan di e ultimo 34 añanan!
E otro aspecto cu hopi hende ta lubida ta e hecho cu Hulanda ta exigi cu e abuso aki MESTER bai den 2 consensus Rijkswetten. Dicon? E contesta ta simpel! Hulanda sa “drommels goed” cu nan ta actua contra e “geest” di nos Statuut y CONTRA tratadonan internacional. Hulanda sa cu Aruba lo no tin exito den e RMR, paso eyden e abusadornan ta sinta planea tur e plan macabro aki cu ayudo di un gobierno zwak manera esun di Aruba.
Unda cu Aruba si por tin exito ta na instancianan internacional! Sinembargo eynan Aruba mester prueba cu ta un tipo di RE-COLONIZACION a tuma lugar. Pues mester prueba cu ta un ABUSO a tuma lugar. Den un caso di cualkier abuso, si esaki a sosode cu consentimento di ambos partido hamas e abusador lo wordo huzga. Y aki ta un biaha mas e gobierno POREDmep a faya. Mescos den un caso di un “rape”! Si e abusador por demonstra cu e “victima” mes tabata kier, niun huez lo huzga e abusador ey!!
Pues si Hulanda ta kere cu e tin e razon na su banda cu nos mes no por, anto no sea tan abusador pero simpelmente bin cu un Algemene Maatregel van Rijksbestuur! E ora ey un proximo gobierno lo por bai pidi ayudo na instancianan imparcial international.
Pero nooo, den e caso aki ela haya un bon colaborador e PM actual di Aruba, mescos cu tabata e caso na 2014 cu Mike Eman a colabora pa mishi cu nos Status Aparte. Esakinan nos ta yama actitud di TRAICION!
PM di Aruba enbez di bai hunga heroe, mester pidi e pueblo Arubano despensa pa e comedia di ultimo simannan. E mester compromete su mes na un COMPROMISO NACIONAL, cu ta contene un plan concreto pa bringa pa deshaci di e plan macabro cu Rutte y Knops. Un plan yen di promesanan falso y irrealistico y yen di mentiranan cu PM a brasa, pero cu cada un ta bay contra di tur principio di un estado di derecho y di bon gobernacion!
Kico awor? UPP ta kere cu ya for di principio mester a bisa Hulanda hopi cla, cu si nan kier abusa di e situacion,”be a man, not a cacarouch” y impone un Algemene Maatregel van Rijksbestuur. Pero awor “politiek Den Haag” ta hunga su rol di e bon Samaritano partiendo “voedselpakketjes (“den lugar di e “kraaltjes en spiegeltjes”) y di un otro banda e ta tin e.o. Aruba den un “nekklem” ala Mitch Henriquez pa bin impone un consensus Rijkswet riba e gobierno zwak di POREDmep! Aruba a perde 5 luna caba cu e novela aki. Aruba no mester acepta e consensus Rijkswet pero simpelmente bisa Hulanda caba cu bo “VERKRACHTING” pero no exigi di Aruba pa acepta un “CONSENTUELE VERKRACHTING “!
#accionpaliberaaruba.
#ala.
Partido UPP
Booshi Wever
6 september 2020
