Dia 2 di juli 2020 e Aruba Off-Road Foundation a presenta na e huicio di Prome Instancia di Aruba pa un proceso sumario contra Fundacion Parke Nacional Arikok (FPNA) y e Gobierno di Aruba, den e caso aki representa door di e minister encarga cu asunto ambiental (GOA). E demanda tabata pa detene e implementacion di e documento di politica d.d 7 di mei 2020 pa FPNA, unda cu a introduci un prohibicion inmediatamente efectivo di ATV y UTV pa tur e areanan bou di e administracion di FPNA, asina cu e GOA no aproba e documento di politica aki pa cu 16 area di reserva natural recientemente designa sin consulta previo cu e fundacion. Diabierna 14 di augustus 2020, e tribunal a rechasa e peticion di e Fundacion Aruba Off-Road.
No ta ningun secreto cu e industria turistico di Aruba a ser afecta na momento cu a cera e frontera desde mita di maart 2020 te cu dia 1 di juli 2020 (pa Caribe y Europa) y 10 di juli 2020 (pa merca). Durante e blokeo aki, miembro nan di e fundacion no por a genera ningun ingreso debi na e medida nan imponi pa e Gobierno di Aruba debi na e Crisis di COVID-19. Di tal manera, e supervivencia di e empresanan, e miembro nan di e Fundacion y e puestonan di trabou cu e empresa nan aki ta proporciona a depende den gran medida di e apertura di e frontera y di e recoridonan na un di e lugar nan mas publicita na Aruba; E Parke Nacional Arikok. E tour mas bendi pa e miembro nan di e Fundacion ta e tour nan di ATV of UTV pa Natural Pool den Parke Arikok, cual pa hopi aña caba ta ser promovi agresivamente den e mercado internacional pa e autoridad di turismo na Aruba. Sin e posibilidad di esaki, e principal preocupacion di e fundacion ta sigui ta e menasa di tin cu manda su trahadonan cas sin salario y sin trabou.
E Fundacion ta compronde e decision di Tribunal pa proteha e areanan di reserva natural, e objetivo di e Fundacion semper tabata logra e regulacion di e uzo di vehiculo manera ATV y UTV cu ta contribui na e preservacion di e area nan di reserva natural. E Fundacion ta lamenta cu FPNA y e Minister di Medio Ambiente no tabata dispuesto na colabora cu e Fundacion den e obhetivo aki cu lo a beneficia no solamente e empresanan sino tambe tur e famianan y trahadonan cu ta empleado di e miembro nan di e fundacion. E Fundacion tabata spera cu e Minister di Asunton Ambiental lo a actua di un manera intermediario pa yega na un solucion pa un posibel periodo regula di “eliminacion” cu por a beneficia tur e partinan, specialmente considerando e cantidad di trabou cu a wordo perdi durante un crisis financiero manera nos ta bibando na Aruba den e momento nan aki. Sin menciona e bentaha economico cu awo a ser duna na e empresanan cu ta opera Jeep Tours, cu ainda por bishita, ingresa Parke Arikok y bishita Natural pool.
Hopi miembro di e Fundacion no por a opera desde cu e fronteranan a habri y nan a gasta nan ultimo recursonan financiero den procedimiento sumario cu e speransa cu ainda por a recupera di e impacto financiero di e crisis COVID-19. Actualmente, e Fundacion ta consultando cu su miembronan pa evalua e posibilidad di cuminsa un procedimento (“bodemzaak”). E decision ainda no a ser tuma. Mientras tanto, e Fundacion lo continua boga pa e siguridad y e practica sostenibel mientras ta purba yega na e Gobierno di Aruba pa pidi papor regula e mercado aki.
