Aruba ta na un cruzada, sea Aruba lo para pa su derecho di autodeterminacion of ta acepta pa wordo re-colonalisa. E traicion na 1950 cu e Interim-regeling ta keda chikito cu e entreguismo aki, si bay di acuerdo cu e condicionnan Hulandes. Pa colmo nos ta wordo humiya den dia cla tambe. Ta circula videonan na unda nos pueblo ta wordo pjnta pa hendenan inutil y e representante di Hulanda na Corsow ta haci un “verkooppraatje ” na unda ta bisa pakico Aruba mester acepta e condicionnan impone riba nos. Si acepta e condicionnan nos a simpelmente wordo bendi na prijs di baca flaco, djis pa un posicion di Prome Minister. Cuidou cu mayan cu nos PM bay hunga “het braafste meisje in de klas” y acepta e condicionnan, anto di otro banda, Corsou y St. Maarten ta para duro riba un NO y al final Hulanda yuda nan toch SIN e condicionnan ridiculo di Hulanda. Kico lo bay bisa y cerca ken lo bay yora e ora? Si acepta e traicion aki anto en berdad MATERIALISMO a vence di IDEALISMO atrobe, pasobra e ta un IDEALISMO pa goberna un pais drechi. Para pa bo IDEALISMO lo percura pa un PROSPERIDAD pa e Pueblo Arubano.
Ultimo lunanan Aruba ta den gara di e COVID-19, confrontando asina retonan grandi particularmente riba tereno di salud y economia. Sinembargo loke ta pasando riba tereno politico ta alarmante. E retonan ta sinembargo prome cu e pandemia a dal nos Isla duro. Ya for di 2014 Hulanda a cuminsa ta exigi un gobernacion transparente y responsabel, pero toch a permiti e gobierno AVPOR “oogluikend” endueda nos pueblo. A menasa na varios ocacion cu un KB y esaki a continua den e gobernacion di POREDmep. E ultimo menasa tabata na februari 2020 y NO pa motibo di COVID-19, pero pa motibo di incumplimiento di e gobierno actual tambe. Loke COVID-19 a haci ta expone e consecuencia di gobernacionnan yena cu corupcion, patronahe politico y mal gobernacion. Pa colmo di un manera hopi ordinario Hulanda kier bin impone awor condicionnan irrazonabel y contra espirito di loke ta para den e Handvest di Nacionnan Uni pa duna e sosten necesario na Aruba.
Despues di a tuma nota di varios declaracionnan di parti di e Minister Presidente ta obvio cu Aruba lo bay sucumbi pa e presion di Hulanda! E mes a bisa cu e ta 80% di acuerdo cu loke Hulanda ta exigiendo. Ta hopi cla en todo caso Gobierno tin cu firma “bij het kruisje” y Parlamento NO ta wordo tení cuenta cune mes. Dus guli manda abou.
Diaranson dia 12 di augustus 2020 na un manera “triomfantelijk” a anuncia cu a trece un cambio hopi “importante ” den e “Memorie van Toelichting” di e Rijkswet di CHE cu ta “na overleg” e 3 macambanan ta tuma e desicion. Pues ta djis NOTIFICA y net net nada mas. No tin nada di ta di hubilo, pero esaki ta pas exactamente den e manipulacion cu ta tumando lugar actualmente. Tambe ta contento ya cu a cambia e nomber di CHE, pa bira OHH. Ki cambio!
Un otro aspecto ta esun di CONSENSO den e decreto di Reino. Una bes cu gobierno acepta e condicionnan ridiculo di Hulanda, Parlamento actual lo NO tin e curashi y no ta permiti tampoco pa bai contra esaki. Mirando loke e PM ta bin ta bisa e ultimo dianan aki, ta parce cu e condicionnan di Hulanda ta un “done deal”! E unico caminda cu ta resta Aruba ta pa bay na instancianan international!! Pero cu ki cara nos ta bay pidi ayudo cerca nan pa algo cu e gobierno POREDmep y e Parlamento “Nobo” mes a bay di acuerdo cune? Pues aki tambe Hulanda a changa nos!
Por ultimo ta importante pa mustra con nos derecho inalienabel di autodeterminacion ta algo cu ta di NOS PUEBLO ARUBANO. NO ta permisbel cu un gobierno zwak di Aruba y un gobierno abusador di Hulanda bay torno na e autonomia cu e pueblo Arubano tin a base di e derecho inalienabel di autodeterminacion aki. Un biaha mas nos unico salida ta pa crea e CONFIANSA back den Pueblo Arubano y den Politiek Den Haag ta pa medio di un “zakenkabinet” pa asina ey mara mannan di e politiconan. Ta e momento pa baha e bandera di partidonan politico y hisa e bandera di Aruba pa sirbi e interes di e pueblo Arubano! Den Parlamento parce cu tin e caminda ey prepara, pero ta keda atrobe na kico Parlamento ta bay haci pa defende realmente nos autonomia. Den pasado ya caba nos a haya un Parlamento cu a para fuerte pero na final di dia toch ta baha cabez ora cu gobierno a tuma un otro desicion. Ban spera cu esey no pasa e biaha aki.
Partido UPP
Booshi Wever
13 di augustus 2020
